Чехия президенти Петр Павел мамлакатнинг яна 14 фуқаросига Украина Қуролли кучлари (УҚК) сафига қўшилишга рухсат берди. Шунингдек, саккизта бундай сўровни рад этди. Бу ҳақда irozhlas.cz ахборот портали маълум қилди.
9 март куни давлат раҳбари лавозимини эгаллаган Петр Павелдан аввал Чехия президенти бўлган Милош Земан 2022 йил 24 февралидан бери республиканинг 132 нафар фуқаросига Украина Қуролли кучлари сафига қўшилиш учун рухсатнома берган. Портал маълумотларига кўра, ҳозиргача умумий ҳисобда 146 нафар фуқаро УҚК сафига қўшилишга рухсат олган.
Шу билан бирга, рухсатнома олганларнинг қанчаси аслида Украинага кетгани маълум эмас. Чехия қонунчилиги республика фуқароларининг президент рухсатисиз ҳарбий ёки ҳарбийлаштирилган хорижий тузилмаларда иштирок этиш имкониятини истисно қилади. Ушбу қоида яшаш учун рухсатномага эга бўлган чет элликлар учун ҳам қўлланиши мумкин.
2 июль куни Чехия ОАВлари полиция мамлакат фуқароларидан бирини республика президенти рухсатисиз Украина Қуролли кучларининг кўнгиллилар батальонига қўшилгани ҳақида хабар тарқатди. ОАВ маълумотларига кўра, у давлат раҳбарига мурожаат қилмасдан украиналиклар сафига қўшилганини тан олди, чунки ҳокимият вакиллари оғзаки баёнотларида Украина мудофаасига қўшилганларни жиноий жавобгарликдан озод қилишни кафолатлашган. Шунинг учун у эркак ўзини айбдор деб ҳисобламаслигини маълум қилган.
Изоҳ (0)