Россия президенти Владимир Путин туркиялик ҳамкасби Ражаб Тоййиб Эрдўғон билан 2 август куни телефон орқали мулоқот қилди. Бу ҳақда Sabah хабар берди.
Президентлар дон битими ва Путиннинг Туркияга ташрифи бўйича келишиб олган. Кремль аввалроқ бундай саёҳат режалари борлигини айтган, бироқ эҳтимолий саналар очиқланмаган.
Путин ва Эрдўғон нима ҳақида гаплашди?
Россия президенти туркиялик ҳамкасби билан Туркияга ташрифи борасида келишиб олган. Бироқ Путиннинг мамлакатга қачон келиши очиқланмаган. Аввалроқ Эрдўғон Россия президентини август ойида кутаётганини айтганди.
Путиннинг ўзи 29 июль куни бўлиб ўтган матбуот анжуманида Эрдўғон билан учрашиш имкониятини изоҳлар экан: “Ёки у бизга келади, ёки мен унинг олдига бораман, кўрамиз”, деганди.
Президентлар бошқа масалалар қатори дон битимини ҳам муҳокама қилган. Эрдўғон Туркия келишувни янгилаш учун дипломатик саъй-ҳаракатларни амалга оширишига ваъда берган. У дон битимининг тўхташи “ҳеч кимга фойда келтирмаслиги”, бундан озиқ-овқат таъминотига муҳтож давлатлар энг кўп зарар кўришини айтган.
Эрдўғон Россия томонига ўрмон ёнғинлари билан курашиш учун Туркияга иккита “Бе-200ЧС” амфибия самолёти жўнатгани учун миннатдорлик билдириб, россиялик сайёҳларнинг Туркияга қизиқиши ортиб бораётганини қайд этган
Икки давлат раҳбарининг телефон орқали мулоқоти ҳақида аввалроқ Россия президенти матбуот котиби Дмитрий Песков маълум қилганди.
Россия ва Туркия раҳбарлари охирги марта ёз бошида телефон орқали гаплашган:
7 июнь куни улар икки томонлама муносабатлар ва Украинадаги вазиятни муҳокама қилган, 24 июнь куни эса Туркия томонининг илтимосига биноан Путин “Вагнер” билан боғлиқ вазиятга ойдинлик киритган. Россиянинг дон шартномасини узайтирмаслик ҳақидаги қароридан кейин президентлар мулоқот қилмади, келишув 17 июль куни бекор қилинганди.
Изоҳ (0)