Бизнес-омбудсманга ўтган 6 ой давомида жами 4 414 та мурожаат келиб тушгани маълум бўлди.
Маълум қилинишича, 27 июль куни Тошкент шаҳар Олмазор туман ҳокимлиги мажлислар залида бизнес-омбудсман ўринбосари Жамшид Урунов томонидан тадбиркорлар билан очиқ мулоқот ўтказилди. Очиқ мулоқотни ўтказишдан мақсад тадбиркорлик субъектларини қийнаётган масалалар, уларнинг фаолиятини қўллаб-қувватлашга қаратилган қонунчиликни такомиллаштириш бўйича таклифларни муҳокама қилишдан иборат.
Учрашув чоғида тадбиркорлар ўзларини қизиқтирган муаммо ва таклифларни илгари сурди. Хусусан, солиқ, кадастр, қурилиш, меҳмонхона бизнеси, дори воситаларига оид масалалар бўйича вакил девони ходимлари томонидан ҳуқуқий тушунтириш берилди.
Очиқ мулоқот томонида кўтарилган масалалар бизнес-омбудсман девони ходимлари томонидан таҳлил қилиниб, очиқ мулоқотга киритилади.
Келтирилишича, 2023 йил январь—июнь ойларида Бизнес-омбудсманга жами 4 414 та мурожаат келиб тушган. Бизнес-омбудсманга келиб тушган асосий масалалар:
- солиқ 18 фоиз,
- ер, кадастр, архитектура 14 фоиз,
- банк, молия ва кредит 13 фоиз,
- инфратузилма 8 фоиз,
- суд ва бошқа орган ҳужжатларини ижро этиши 7 фоизни ташкил этди.
Шунингдек, “Тадбиркор виртуал офиси” ахборот портали орқали тадбиркорлардан 4 399 та мурожаат келиб тушган. Мурожаатларни кўриб чиқиш натижаларига кўра тадбиркорлар манфаатида судларга жами 24 миллиард сўмлик 74 та даъво аризаси киритилган бўлиб, бунинг натижасида тадбиркорлар фойдасига 12,9 миллиард сўм ундирилиши белгиланган.
Мурожаатларини кўриб чиқишда қонун бузилиши ҳолатларига йўл қўйган мансабдор шахсларга нисбатан 1 675 та таъсир чоралари қўлланилди. Тегишли идораларга 81 та тақдимнома киритилди. Ўтган давр мобайнида бизнес-омбудсман девони томонидан шунингдек, маъмурий ҳуқуқбузарликка оид 1 474 та баённома расмийлаштирилди.
Изоҳ (0)