Маданият вазирлиги бахшичилик фестивалидаги овқатлар учун қарийб 900 млн сўм сарфлади. Бу пуллар оқилона ишлатилганига бир қатор шубҳалар мавжуд

Маданият ва туризм вазирлиги ҳузуридаги Халқаро фестиваллар дирекцияси 6—8 май кунлари Сирдарёда бўлиб ўтган Халқаро бахшичилик фестивали меҳмонларини озиқ-овқат билан таъминлаш учун қарийб 900 миллион сўм сарфлади. “Дарё” лот маълумотларини кузатиш давомида шубҳали ҳолатга дуч келди.

Халқаро фестиваллар дирекцияси давлат харидини ҳеч қандай танлов ёки тендер савдоларисиз, шунчаки тўғридан тўғри амалга оширган. 23 апрель куни “Муяссар-Робия” МЧЖ билан шартнома имзоланган бўлиб, унга кўра, фестиваль иштирокчиларини овқатлантириш харажатлари қуйидагича ҳисоб-китоб қилинган:

• 4750 кишилик нонушта — 159 миллион 600 минг сўм (ҳар бири 33 минг сўмдан);
• 3950 кишилик тушлик — 199 миллион 80 минг сўм (ҳар бири 50 минг 400 сўмдан);
• 3500 кишилик тушдан кейинги овқат — 98 миллион сўм (ҳар бири 28 минг сўмдан);
• 3500 кишилик кечки овқат — 176 миллион 400 минг сўм (ҳар бири 50 минг 400 сўмдан).

Бундан ташқари, кофе-брейк хизмати учун 264 миллион 512 минг 640 сўм сарфланган. Бахшичилик фестивали қатнашчиларини овқатлантириш умумий ҳисобда 897 миллион 592 минг 640 сўмга тушган.

Етказиб берувчи “Муяссар-Робия” тадбиркорлик субъекти раҳбарияти билан танишамиз. МЧЖнинг 100 фоизлик таъсисчиси ва раҳбари Содиқов Валижон Бахтиёрович ҳисобланади. У бир пайтнинг ўзида бошқа бир корхона — “Муштарийбону-Асилбек-Абзалбек” МЧЖга ҳам раҳбар ҳисобланади.

Қизиғи ва шубҳалиси шундаки, ушбу тадбиркорлик субъектининг таъсисчиси Авазбек Абдулҳамидович Шомуродов деб кўрсатилган. Авазбек Шомуродов эса 2022 йилнинг июль ойидан буён Тошкент вилояти Маданият ва туризм бошқармаси раҳбари ҳисобланади.

Бу ҳолат бир қанча саволларни келтириб чиқариши табиий. Мисол учун, “Давлат фуқаролик хизмати тўғрисида”ги қонуннинг 13-моддасига кўра, давлат фуқаролик хизматчиси тадбиркорлик фаолияти субъектларини ташкил этиши, уларнинг муассиси бўлиши мумкин эмас. Аммо нега орадан қарийб бир йил ўтган бўлса ҳам, Авазбек Шомуродов ҳолати бўйича ҳокимликка тегишли тақдимнома киритилиб, мансабдор шахснинг тадбиркорлик субъектларидаги фаолияти тугатилиши чоралари кўрилмади?

Халқаро бахшичилик фестивали ҳар икки йилда бир марта бўлиб ўтиши ҳақида 2021 йилдаёқ қарор қилинган эди. Яъни бу тадбирга тайёргарлик кўриш ва уни ўтказишга етарлича муддат бўлган, шошилинч тарзда харидлар амалга оширишга эҳтиёж йўқ эди. Шундай экан, нега ундаги меҳмонларни овқатлантириш хизмати учун давлат хариди очиқ тендер савдоларига қўйилмай, доимий ҳамкорга (“Муяссар-Робия” МЧЖ бундан аввал ҳам Маданият вазирлигининг бир қанча хизматларини бажариб келган) тўғридан тўғри бериб юборилди? 

Ва нега айнан бу тадбиркорлик субъекти танлаб олиш жараёнида устунликка эришилди? Бунда Авазбек Шомуродов корхонага билвосита боғлиқ экани таъсир ўтказмагани қанчалик ишонарли?

Тегишли ташкилотлардан муносабат кутиб қоламиз.