Тошкент вилояти Олмалиқ шаҳрида эркак икки ёш болани ахлоқсиз ҳаракатлар қилишга мажбурлаганди. Бош прокуратура ҳолат юзасидан жиноят иши қўзғатилганини эълон қилди.
Суриштирув давомида ушбу шахс руҳий касалликлар диспансерида рўйхатда туриши аниқланганди. Республика тиббий ижтимоий экспертиза инспекциянинг тегишли маълумотига кўра, фуқаро болалигидан иккинчи гуруҳ ногирони.
Тошкент вилояти ИИББ ҳолат юзасидан яқинлари билан ўтказилган профилактик суҳбат ва терговга қадар суриштирув давомида унинг ҳозирги ҳолати мутахассислар томонидан ўрганилиб, даволаниши учун Олмалиқ шаҳридаги руҳий асаб касалликлари диспансерига жойлаштирилганини маълум қилганди.
Бош прокуратура берган ахборотга кўра, ушбу эркакка нисбатан Жиноят кодексининг 129-моддаси (ўн олти ёшга тўлмаган шахсга нисбатан уятсиз-бузуқ ҳаракатлар қилиш) билан жиноят иши қўзғатилди. Мазкур жиноят иши бўйича Олмалиқ шаҳар ИИБ ТБ томонидан дастлабки тергов ҳаракатлари амалга оширилмоқда.
Суриштирув давомида аниқланишича, фуқаро Пискент туманида доимий яшайди ва қайд этилганидек руҳий касалликлар диспансерида “Д” назоратда туради. Воқеа содир бўлган куни оила аъзолари билан Олмалиқ шаҳрига тўй маросимига келган ва у ерда спиртли ичимлик истеъмол қилган. Сўнг тўйхонадан чиқиб кетиб ёш болаларга нисбатан юқоридаги ҳаракатни содир қилган.
Изоҳ (0)