Самарқанддаги қабристонда ёнғин содир бўлди

Самарқанд вилояти Қўшработ туманидаги қабристонда ёнғин содир бўлди, деб хабар беради вилоят ФВБ ахборот хизмати.

Қайд этилишича, 23 июль куни соат 12:08 да Қўшработ тумани “Қўролос” МФЙ, “Қўролос” қишлоғида жойлашган “Бубак Ота” қабристонида ёнғин содир бўлаётгани тўғрисида туман фавқулодда вазиятлар бўлимига хабар келиб тушган.

Воқеа жойига 2 та ёнғин-қутқарув экипажи жалб этилган. Ёнғинга соат 12:14 да етиб борган ва соат 13:29 да ёнғин тўлиқ бартараф этилган. Ёнғин натижасида қабристоннинг тахминан 3 гектар майдонида хас-хашак ёнган.

Ҳодиса оқибатида ҳалок бўлган ва жабрланганлар йўқ. Ҳозирда ҳолат юзасидан терговга қадар текшириш ишлари олиб борилмоқда.

Самарқанд қабристонида ёнғинлар

Самарқанд вилоятида жойлашган қабристонларда ёнғин содир бўлиш ҳолати биринчи марта кузатилмаяпти. 2020 йилда Оқдарё туманидаги қабристонда қоровуллар айби билан ёнғин чиққанди. 2021 йилда Қўшработ туманида жойлашган қабристонда, 2022 йилда эса Оқдарё тумани “Мустақиллик” маҳалласида жойлашган “Қанғли” қабристонида ёнғин юз берганди.