Ўзбекистонга ҳафтанинг иккинчи ярмида салқин ҳаво кириб келади

“Ўзгидромет” ҳафта давомида кузатиладиган об-ҳаво ҳақида маълумот берди.

Унга кўра, бошланган ҳафтанинг катта қисмида Ўзбекистон ҳудуди бўйича иссиқ об-ҳаво бўлиши кутилмоқда. Кундуз кунлари ҳарорат 39-42 даражага, жанубда ва чўл ҳудудларда, шунингдек, 24–25 июль кунлари республика шимолида баъзи жойларда 43-44 даражага етади.

27 июлда Қорақалпоғистон Республикаси ва Хоразм вилоятига, 28 июлда республиканинг барча ҳудудларига Қозоғистон ҳудудларидан нисбатан салқин ҳаво кириб келади ва ҳарорат 35-38 даражагача, жанубда 40-42 даражагача бир оз пасаяди. Бундай ҳарорат ҳафта охирида ҳам сақланиб туради.

Шимолда, жанубда ва чўл ҳудудларда шамол тезлиги 13-18 метр/секундгача, айрим жойларда 20-22 метр/секундгача кучайиши, чанг-тўзон кузатилиши мумкин.

Тоғли ҳудудларда 24 июлда куннинг иккинчи ярмида ва ҳафта охирида баъзи жойларда қисқа муддатли ёмғир ёғиши, момақалдироқ бўлиши мумкин.

Тошкентда 24–27 июль кунлари ҳаво асосан кам булутли бўлади, ёғингарчилик кутилмайди. Ҳарорат 24–27 июлда 39-42 даража, 28 июлда 38-40 даража бўлади.