Ўзбекистонда 2023 йилнинг ўтган олти ойи давомида тез ёрдам хизматига 6,3 миллиондан ортиқ чақириқ келиб тушган. Бу ҳақда Республика тез тиббий ёрдам марказига таяниб, ССВ матбуот хизмати хабар берди.
Қайд этилишича, январь—июнь ойларида тез ёрдамга мамлакат бўйича жами 6 миллион 337 минг 764 та чақириқ келиб тушган. Шундан 432 764 нафар катта ёшли, 155 978 нафар кичик ёшли беморлар шифохоналарга госпитализация қилинди.
Энг кўп мурожаатлар:
- Фарғона вилоятида — 697 224 та;
- Андижон вилоятида — 640 316 та;
- Тошкент шаҳрида — 624 367 та;
- Тошкент вилоятида — 609 270 та;
- Наманган вилоятида — 580 912 та қайд этилган.
Тез ёрдам хизматига энг кам чақириқ Навоий (199 007 та ), Сирдарё (232 702 та) ва Жиззах (248 777 та) вилоятларида кузатилган. Маълумот учун, ўтган 2022 йил тез тиббий ёрдам хизматига жами 13 миллион 22 мингдан ортиқ чақириқ келиб тушган эди.
Тез ёрдам ходимлари билан боғлиқ можаролар
Тошкент шаҳар Бектемир туманида тез ёрдам машинасида олиб кетилаётган аёл тиббиёт ходимларига қаршилик кўрсатиб, салондаги жиҳозларни тепиб синдиргани тўғрисида хабар берилганди. Кейинроқ аёл спиртли ичимлик таъсирида бўлгани маълум қилинган эди. Шунингдек, Юнусобод тез тиббий ёрдам подстанцияси фелдшери Злата Гафурова чақириқ бўйича эркак шифокорлар бригадасини юборгани учун беморнинг ўғли томонидан таҳдидга учраётгани маълум бўлганди.
2022 йил октябрь маълумотларига кўра, Ўзбекистонда тез ёрдам хизматида фаолият юритаётган шифокорлар сони қарийб 13 минг 800 нафарга етган. Шунингдек, тизимда меҳнат қилаётган ўрта тиббиёт ходимлари сони 29 минг 156 нафарни ташкил қилмоқда.
Изоҳ (0)