Навоий, Жиззах ва Сурхондарё вилоятларида пул эвазига ҳайдовчилик гувоҳномасини олиб беришни ваъда қилган шахслар ушланди, деб хабар беради Бош прокуратура ҳузуридаги департамент.
Қайд этилишича, департаментнинг Хатирчи туман бўлими томонидан ИИБ ходимлари билан ҳамкорликда тезкор тадбир ўтказилган. Тадбирда муқаддам фирибгарлик ва бошқа жиноятлари учун тўрт марта судланган О.А. фуқаро И.М.га танишлари ёрдамида “Б” тоифадаги ҳайдовчилик гувоҳномасини олиб бериши эвазига 500 долларни олган вақтида ашёвий далиллар билан ушланган.
Шу каби, департамент ҳамда ДХХнинг Жиззах вилояти бошқармалари ва Янгиобод туман бўлими томонидан ўтказилган тезкор тадбирда “Д.А.” МЧЖ ўргатувчиси Ғ.Э. фуқаро У.М.га юқори лавозимда ишловчи танишлари ёрдамида имтиҳонга қатнашмасдан ҳайдовчилик гувоҳномаси олиб бериши эвазига 4,2 миллион сўмни олган вақтида қўлга тушган.
Худди шундай, департаментнинг Сурхондарё вилояти бошқармаси, Шўрчи туман бўлими томонидан ДХХ ва ИИБ ходимлари билан ҳамкорликда ўтказилган тезкор тадбирларда А.Х. исмли шахс фуқаро А.Т.га “Б. C.” тоифали ҳайдовчилик гувоҳномаси олиб бериши эвазига 300 долларни олган вақтида, Шўрчи туманида эса А.Н. фуқаро Т.Ж.га имтиҳонга қатнашмасдан ҳайдовчилик гувоҳномаси олиб бериши эвазига 300 долларни олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 25, 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Апрель охирларида Тошкент вилоятида сохта сертификат эвазига ҳайдовчилик гувоҳномаси олган фуқарога суд ҳукми ўқилганди. Унга Жиноят кодексининг 59-моддасига асосан тайинланган жазоларни қисман қўшиш йўли билан узил-кесил ўташ учун иш ҳақининг 20 фоизини давлат даромади ҳисобига ушлаб қолган ҳолда 2,5 йил муддатга ахлоқ тузатиш ишлари жазоси тайинланган. Май ўрталарида бўлса, Фарғонада 200 долларга “права” олиб беришни ваъда қилган автомактаб раҳбари ушланганди.
Изоҳ (0)