O‘zbekistonda 2023-yilning o‘tgan olti oyi davomida tez yordam xizmatiga 6,3 milliondan ortiq chaqiriq kelib tushgan. Bu haqda Respublika tez tibbiy yordam markaziga tayanib, SSV matbuot xizmati xabar berdi.
Qayd etilishicha, yanvar—iyun oylarida tez yordamga mamlakat bo‘yicha jami 6 million 337 ming 764 ta chaqiriq kelib tushgan. Shundan 432 764 nafar katta yoshli, 155 978 nafar kichik yoshli bemorlar shifoxonalarga gospitalizatsiya qilindi.
Eng ko‘p murojaatlar:
- Farg‘ona viloyatida — 697 224 ta;
- Andijon viloyatida — 640 316 ta;
- Toshkent shahrida — 624 367 ta;
- Toshkent viloyatida — 609 270 ta;
- Namangan viloyatida — 580 912 ta qayd etilgan.
Tez yordam xizmatiga eng kam chaqiriq Navoiy (199 007 ta ), Sirdaryo (232 702 ta) va Jizzax (248 777 ta) viloyatlarida kuzatilgan. Maʼlumot uchun, o‘tgan 2022-yil tez tibbiy yordam xizmatiga jami 13 million 22 mingdan ortiq chaqiriq kelib tushgan edi.
Tez yordam xodimlari bilan bog‘liq mojarolar
Toshkent shahar Bektemir tumanida tez yordam mashinasida olib ketilayotgan ayol tibbiyot xodimlariga qarshilik ko‘rsatib, salondagi jihozlarni tepib sindirgani to‘g‘risida xabar berilgandi. Keyinroq ayol spirtli ichimlik ta’sirida bo‘lgani ma’lum qilingan edi. Shuningdek, Yunusobod tez tibbiy yordam podstansiyasi feldsheri Zlata Gafurova chaqiriq bo‘yicha erkak shifokorlar brigadasini yuborgani uchun bemorning o‘g‘li tomonidan tahdidga uchrayotgani ma’lum bo‘lgandi.
2022-yil oktabr ma’lumotlariga ko‘ra, O‘zbekistonda tez yordam xizmatida faoliyat yuritayotgan shifokorlar soni qariyb 13 ming 800 nafarga yetgan. Shuningdek, tizimda mehnat qilayotgan o‘rta tibbiyot xodimlari soni 29 ming 156 nafarni tashkil qilmoqda.
Izoh (0)