Россия президенти матбуот котиби Дмитрий Песков РТ Арабиc телеканалига берган интервьюсида Украинани “демилитаризация қилиш вазифасининг катта қисми бажарилган”ини айтди.
“Махсус ҳарбий операция бошланганида Украина қаттиқ ҳарбийлаштирилган эди. Кеча Путин айтганидек, олдимиздаги вазифалардан бири Украинани демилитаризация қилиш эди. Умуман олганда бу вазифанинг катта қисми бажарилди”, — деди Песков.
Унинг тушунтиришича, ҳозир Украина ўз қуролларидан камроқ фойдаланиб, кўпроқ Ғарб давлатлари унга етказиб бераётган қурол тизимларига таянмоқда.
Песков шунингдек, Ғарб давлатлари “можарога борган сари киришаётгани” ва шу тариқа, уруш томонига айланаётганини қўшимча қилди.
“Бу эса можаронинг чўзилиб кетишига сабаб бўлади. Оқибатда Европадаги вазият янада кескинлашиши ва олдиндан айтиб бўлмайдиган ҳолга келиши мумкин. Бу Россияни хавфсизликни таъминлаш учун янада қатъийроқ чоралар кўришга мажбур қилади”, — деди Кремль вакили
2023 йил май ойида Дмитрий Песков Россия “махсус ҳарбий операцияни” бошлашда ўз олдига қўйган мақсадларига бир йилдан ортиқ давом этган уруш пайтида “қисман эришганини” айтганди.
Изоҳ (0)