Энг яхши “пломба” қайси, имплант тишлар нега қиммат, брикет кимларга қўйилади? — стоматолог билан суҳбат (видео)

Одамнинг тиши қайта тикланмайди. Шунинг учун яроқсиз ҳолга келганда тиш ё вақтинчага даволаб қўйилади ёки олиб ташланади. Саломатлик лойиҳасининг бу галги сони тишлар саломатлиги, тиш касалликлари ва уни олдини олиш чоралари ҳақида.

Кўпчилик тиш имплантатларини қўйдиришдан хавфсирайди. Аммо имплант тишлар стоматология соҳасининг сўнгги ютуқларидан бири ўлароқ йўқ тишлар ўрнини тўлдиришнинг энг муқобил усули бўлиб хизмат қилмоқда. Кимларга имплант тишлар қўйиш тавсия этилади? Ушбу саволга жавоб топиш мақсадида “Дарё” мухбири Наргиза Юнусова тиш шифокори Ҳусниддин Ғуломиддинов билан суҳбат уюштирди.

Тиш имплантатлари — соғлом тишлар айрим бир сабабларга кўра йўқотилганда улар ўрнига қўйилиб, худди шу вазифани бажарадиган сунъий тиш ҳисобланади. Имплант тишлар вояга етган ҳар қандай ёшдаги одамга қўйилиши мумкин. Ва улар ўз қоидаларига риоя қилинган ҳолда қўйилган тақдирда 80-90 фоиз ҳолларда организмга ўрнашиб, битиб кетади.

Ҳозирги кунда, айниқса, ёши катта одамлар орасида имплант тишларни қўйдиришдан хавфсирайдиганлари йўқ эмас. Битиб кетмаслигидан ёки доимий оғриқ бўлишидан хавотирланади. Лекин бугунги замонавий имплантатлар муаммо туғдирмайди, оғриқ даражаси ҳам минимал бўлади. Фақат сурункали бирор касаллиги бўлган беморлардагина чеклов бўлиши эҳтимоли мавжуд. Масалан, қандли диабет билан оғриганда ҳам қанд миқдори баланд бўлганларга имлант тишлар қўйилмайди, агар касалликни назорат қилиш мумкин бўлса, ҳеч қандай чеклов бўлмайди.

Ўзбекистон шароитида бир дона имплант тиш қўйиш нархи ўртача 200-500 доллар атрофида бўлиб, бу чет эл мамлакатлари билан таққослаганда 3-4 баробар арзон. Ваҳоланки, асбоб-ускуналардан тортиб, жараёнгача деярли фарқ қилмайди. Бу нарх ҳар қайси мамлакат аҳолисининг ички иқтисодий ҳолатидан келиб чиққан ҳолда белгиланади.  

Шунингдек, тиш “пломба”сининг турлари ва энг афзал пломба қайси экани, тишларга брикет мосламаларини неча ёшдан бошлаб, кимларга қўйиш мумкинлиги ва ақл тишлари қайси ҳолларда олдириб ташланади деган саволларга батафсил жавоб олиш учун қуйидаги видеосуҳбатни кўриш тавсия этилади.