Odamning tishi qayta tiklanmaydi. Shuning uchun yaroqsiz holga kelganda tish yo vaqtinchaga davolab qo’yiladi yoki olib tashlanadi. Salomatlik loyihasining bu galgi soni tishlar salomatligi, tish kasalliklari va uni oldini olish choralari haqida.
Ko‘pchilik tish implantatlarini qo‘ydirishdan xavfsiraydi. Ammo implant tishlar stomatologiya sohasining so‘nggi yutuqlaridan biri o‘laroq yo‘q tishlar o‘rnini to‘ldirishning eng muqobil usuli bo‘lib xizmat qilmoqda. Kimlarga implant tishlar qo‘yish tavsiya etiladi? Ushbu savolga javob topish maqsadida “Daryo” muxbiri Nargiza Yunusova tish shifokori Husniddin G‘ulomiddinov bilan suhbat uyushtirdi.
Tish implantatlari — sog‘lom tishlar ayrim bir sabablarga ko‘ra yo‘qotilganda ular o‘rniga qo‘yilib, xuddi shu vazifani bajaradigan sun’iy tish hisoblanadi. Implant tishlar voyaga yetgan har qanday yoshdagi odamga qo‘yilishi mumkin. Va ular o‘z qoidalariga rioya qilingan holda qo‘yilgan taqdirda 80-90 foiz hollarda organizmga o‘rnashib, bitib ketadi.
Hozirgi kunda, ayniqsa, yoshi katta odamlar orasida implant tishlarni qo‘ydirishdan xavfsiraydiganlari yo‘q emas. Bitib ketmasligidan yoki doimiy og‘riq bo‘lishidan xavotirlanadi. Lekin bugungi zamonaviy implantatlar muammo tug‘dirmaydi, og‘riq darajasi ham minimal bo‘ladi. Faqat surunkali biror kasalligi bo‘lgan bemorlardagina cheklov bo‘lishi ehtimoli mavjud. Masalan, qandli diabet bilan og‘riganda ham qand miqdori baland bo‘lganlarga imlant tishlar qo‘yilmaydi, agar kasallikni nazorat qilish mumkin bo‘lsa, hech qanday cheklov bo‘lmaydi.
O‘zbekiston sharoitida bir dona implant tish qo‘yish narxi o‘rtacha 200-500 dollar atrofida bo‘lib, bu chet el mamlakatlari bilan taqqoslaganda 3-4 barobar arzon. Vaholanki, asbob-uskunalardan tortib, jarayongacha deyarli farq qilmaydi. Bu narx har qaysi mamlakat aholisining ichki iqtisodiy holatidan kelib chiqqan holda belgilanadi.
Shuningdek, tish “plomba”sining turlari va eng afzal plomba qaysi ekani, tishlarga briket moslamalarini necha yoshdan boshlab, kimlarga qo‘yish mumkinligi va aql tishlari qaysi hollarda oldirib tashlanadi degan savollarga batafsil javob olish uchun quyidagi videosuhbatni ko‘rish tavsiya etiladi.
Izoh (0)