Андижондаги тергов ҳибсхонасида 12 нафар ИИБ ходими томонидан уриб ўлдирилгани айтилган марҳум Санжарбек Мамажонов ўлимидан аввал тергов ҳибсхонасининг кузатув камералари йўқ бўлган жойида сақлангани маълум бўлди. Бу ҳақда Тошкент вилояти судининг апелляция инстанциясида сўз олган судланувчи У.А. гапириб берди.
Андижондаги 3-сонли тергов ҳибсхонасида бошлиқ ёрдамчиси, смена бошлиғи вазифасида ишлаб келган судланувчининг айтишича, у маҳкум Санжарбек Мамажоновни 2022 йил 20 март куни соат 08:00 да қабул қилиб олиб, 21 март куни соат 10:00 да бошқа ҳамкасбига топширган.
Судланувчининг судда маълумот беришича, маҳкум Санжарбек Мамажонов унинг навбатчилиги куни тоби қочиб, ғалати гапларни гапирган.
“Ҳожи ака, мени қўйворинглар, мен мол бозорига боришим керак”, деб ғалати гапларни гапирган эди, — дейди судда воқени ёдга олган У.А.
Унинг яна ёдга олишича, маҳкумнинг тоби қочгач, унга шифокор томонидан ёрдам кўрсатилган. Шунингдек, камерадошларининг шикоятига кўра, тутқаноғи тутиб қолмаслиги учун бошқа камерага кўчирилган. Сўнгра жуда терлаб, усти нам бўлиб кетгани боис, бошқа бир маҳкумнинг кийимини ҳам кийган. Шундан сўнг, тергов ҳибсхона ходимлари уни кузатув камераларидан пана жой — кириш йўлакларидаги зинапоя олдида сақлаб турган.
Суд мажлисида судланувчига савол билан юзланган прокуратура ходими “Соғлиғида муаммо бўлган маҳкумни нега ‘санчаст’га ётқизиш ёки тутқаноғи бўлса ўзига зарар етказмайдиган махсус камерага жойлаштириш ҳаракатини кўрмадингиз? Бу сизнинг вазифангиз эдими? Нега уни зинопоялар олдида, кузатув камеларидан панада сақладингиз?”, — дея савол берди.
Прокурор саволига жавоб берган судланувчи маҳкумни “санчаст”га жойлаштириш бўйича шифокор тавсияси йўқлигини, тутқаноқ касаллиги билан оғриганлар сақланувчи махсус камерага жойлаштирмаганининг боиси эса, маҳкум терлаб кетаётгани боис, унга ҳаво керак деб ўйлагани учун ҳаво эсиб турган зинапоя олдига олиб чиққанини маълум қилди.
Мен маҳкумни унинг ҳаракатларидан шикоят қилаётган камерадошлари олдида қолдиришим ҳам мумкин эди. Аммо унга бирор гап бўлишидан қўрққаним сабаб, уни ёнимда олиб ўтирдим. Унга қайғурганимдан шундай қилдим. Биз маҳкумлар хавфсизлигини таъминласак, навбатчиликдан ташқаридаги пайтимиз, яъни уйимизда хотиржам бўламиз”, — деди судланувчи.
Мазкур воқеа юзасидан билдирилган дастлабки маълумотлардан маълум бўлишича, тергов ҳибсхонасининг 58-камерасига ўтказилган маҳкум ўзини ёмон ҳис қилаётганини айтгач, 20 март куни 49-камерага жойлаштирилган. Маҳкум бу камерада ҳам тоби йўқлигини айтиб, бошқа маҳкумларга халал бергач, ҳибсхонанинг 7 нафар ходими томонидан камерасиз хонада тўрт соатдан ортиқ вақт давомида аёвсиз калтакланиб, айнан шу камерада номаълум муддатга ушлаб турилган. Кейин эса соат 11:00 ларда маҳкумнинг соғлиғи ёмонлашганига қарамасдан бошқа камерага ўтказилган. Маҳкум ўша камерада бошқа бир маҳкум томонидан ҳам калтакланган. Ўз вақтида ёрдам кўрсатилмаганлиги сабабли ўша куни соат 14:30 да вафот этган.
- Суд марҳумнинг ўлимига сабабчи деб топган ИИВ ЖИЭДга қарашли 3-сон тергов ҳибсхонасида ишловчи 6 нафар ходимнинг ҳар бирини 1 йил 6 ой муддатга ички ишлар органлари тизимида ишлаш ҳуқуқидан маҳрум қилган ҳолда 4 йил муддатга озодликдан маҳрум қилганди.
- Шунингдек, қолган 6 нафар ходим эса 1 йил 6 ой муддатга ички ишлар органлари тизими ва шифокорлик лавозимларида ишлаш ҳуқуқидан маҳрум этилиб, 3 йилга озодликни чеклаш жазоси билан жазоланганди.
- Бундан ташқари, марҳум маҳбусни камерада калтаклаган маҳкум Ж.У.га 4 йил 1 ой муддатга озодликдан маҳрум қилиш жазоси тайинланган.
- 32 ёшли маҳбусни уриб ўлдиришда айбланиб, жазога тортилган 12 нафар тергов ҳибсхона ходимларининг 10 нафари Жиноят ишлари бўйича Ангрен шаҳар судининг 2023 йил 22 май куни ўқилган ҳукмидан норози бўлиб, Тошкент вилояти судининг аппеляция инстанциясига шикоят қилган.
- Уларнинг шикояти судья Саидаҳрор Умаров раислигида кўриб чиқилмоқда.
Изоҳ (2)
жуда зур эртак
жуда зур эртак