«Чироқчи воқеаси» ортидан вилоят ИИБ бошлиғи ўринбосари ишдан кетди

Чироқчи туманида 32 ёшли фуқаронинг ИИБ ходимлари томонидан уриб ўлдириб қўйилгани ортидан вилоят ИИБ бошлиғининг биринчи ўринбосари лавозимидан кетган. Бу ҳақда бугун вилоят ИИБда бўлиб ўтган матбуот анжуманида айтиб ўтилди, деб хабар беради «Дарё» мухбири.

Шоҳрух Ғиёсовнинг маълумот беришича, вилоят ИИБнинг биринчи ўринбосари Самад Турдиев шу воқеа сабаб лавозимидан кетган.

«ИИБ бошлиғининг биринчи ўринбосари шу воқеа сабаб аризасини ёзди, виждони қийналди», — деди Шоҳрух Ғиёсов.

Матбуот анжуманида «Дарё» мухбири 2019 йил Қарши туман ИИБ бошлиғининг фермерга куч ишлатиши «Дарё» интернет нашрида батафсил ёзилганини айтиб, воқеадан бироз ўтиб туман ИИБ бошлиғи ишдан олинганини, аммо сабаби оммага ошкор қилинмаганини таъкидлади. Ва мазкур ҳолатга изоҳ сўради.

«Бу ҳақда айни пайтда менда маълумот йўқлиги боис ўрганиб батафсил маълумот беришни вилоят ИИБ ахборот хизмати зиммасига юкласак ва сизларга қулай бирор кунда шу ҳақда матбуот брифинги ташкил этилади», — деди Шоҳрух Ғиёсов.

Эслатиб ўтамиз, Қашқадарё вилоятининг Чироқчи туманида яшовчи 32 ёшли эркак А.Ю. 22 январь, чоршанба куни, яшаш уйидан туман ИИБ ходимлари томонидан олиб кетилган. 23 январь, пайшанба куни, эса ИИБдан мурдаси чиққан. Ушбу ҳолат юзасидан жиноят иши қўзғатилиб, Чироқчида бир неча ИИБ ходими қамоққа олинди.

Чироқчи туманида ўғриликда гумонланган 32 ёшли фуқарони уриб ўлдирган ИИБ ходимлари ўз қилмишини яширишга ҳам уринган. Бу ҳақда марҳум Ю.А. билан бирга калтакланган ота-бола — Қурбон Остоноев ҳамда Баҳром Авлиёқуловлар маълум қилди.

Қашқадарё вилояти ИИБда 30 январь куни ўтказилган брифингда Ўзбекистон ички ишлар вазири матбуот котиби Шоҳрух Ғиёсов сўзга чиқиб, ИИБ биносида одам ўлими ҳолати янгилик эмаслигини таъкидлади.

Ўзбекистон Олий Мажлиси Сенати Чироқчидаги ИИБ ходимлари қотиллигининг тергови бош прокурор томонидан назоратга олинганини маълум қилди.