Қашқадарё вилоятининг Чироқчи туманида мол ўғирлашда гумон қилинган 32 ёшли эркак ИИБ ходимлари томонидан калтакланиши оқибатида вафот этган эди. Кейинроқ ИИБнинг бошқа ходимлари ушбу жиноятни яшириш мақсадида гувоҳларга босим ўтказгани маълум бўлганди. Мазкур ҳолат юзасидан жиноят иши очилиб, икки нафар ИИБ ходими қамоққа олингани ҳақида хабар берилган эди.
«Xabar.uz»нинг ўз манбасига таяниб ёзишича, қамоққа олинган ИИБ ходимларидан бири Чироқчи тумани ИИО ФМБнинг 4-сон ИИБ бошлиғи ҳисобланади. Нашрнинг ёзишича, мазкур шахс ушбу лавозимга 2019 йил июнь ойида тайинланган.
Қайд этилишича, ҳибсдаги иккинчи шахс туман ИИБ Жиноят қидирув бўлими тезкор ходими бўлган. Нашр манбасига кўра, марҳум А.Ю. 4-сон ИИБ бошлиғининг хизмат хонасида ваҳшийларча калтакланиши оқибатида ўша жойнинг ўзида вафот этган.
Нашр хабарида жиноят иши тергови доирасида Чироқчи тумани ИИБ қатор ходимларининг жавобгарликка тортилиши эҳтимоли катталиги айтилмоқда.
Эслатиб ўтамиз, мазкур ҳолат бўйича Чироқчи тумани Ички ишлар органлари (ИИО) фаолиятини мувофиқлаштириш бўлими (ФМБ) ходимларига нисбатан Жиноят кодексининг 206-моддаси 1-қисми (Мансаб ваколати доирасидан четга чиқиш), 104-моддаси 3-қисми «д» банди (Жабрланувчининг ўлишига сабаб бўладиган даражада қасддан баданга шикаст етказиш) ва 235-моддаси 3-қисми (қийноққа солиш ва бошқа шафқатсиз, ғайриинсоний ёки қадр-қимматни камситувчи муомала ҳамда жазо турларини қўллаш) билан жиноят иши қўзғатилиб, тергов ҳаракатлари олиб борилмоқда.
Мазкур воқеалар ортидан Қашқадарё вилоят ИИБ бошлиғининг биринчи ўринбосари Самад Турдиев ўз лавозимидан кетган.
Ўзбекистон Сенати Чироқчидаги мазкур қотилликнинг тергови бош прокурор томонидан назоратга олинганини маълум қилди.
Мазкур аянчли воқеа юзасидан Қашқадарё вилояти ИИБ биносида оммавий ахборот воситалари ходимлари учун ўтказилган махсус брифингда Ўзбекистон ички ишлар вазири матбуот котиби Шоҳрух Ғиёсов ИИБ биносида одам ўлими ҳолати янгилик эмаслигини таъкидлаб ўтган.
Изоҳ (0)