Олий Мажлис Қонунчилик палатаси ва Сенатининг қўшма мажлисида Ўзбекистоннинг сайланган президенти Шавкат Мирзиёев тантанали қасамёд қилиб, ўз лавозимига киришди. Тантанали тадбирда сўзга чиққан давлат раҳбари “сайлов ўтди — сафарбарлик тугади”, деб ўйлаётганлар хато қилишини айтди.
Президент сайловнинг эртаси куниёқ белгилаб олинган улкан мақсадларни амалга ошириш бўйича қатъий ҳаракатларни бошланганини таъкидлади. Шавкат Мирзиёев вақт, ҳаёт кутиб турмаслигини, даврнинг ўзи барчани тезкор бўлишга, керак бўлса, вақтдан ўзиб ишлашга ундаётганини маълум қилди.
Кимки “сайлов ўтди – сафарбарлик тугади”, деб ўйласа, хато қилади. Ҳақиқий сафарбарлик энди бошланади. Чунки халқимиз бизга ишониб топширган катта-катта режа ва дастурларни ўзимиз бажармасак, айтинг, четдан ким келиб бажариб беради, — дейди президент.
Шавкат Мирзиёев келгуси етти йилга мўлжаллаб ишлаб чиқилган стратегик мақсадларга эришиш учун барча куч ва имкониятлар борлигини, қанчалик қийин ва машаққатли бўлмасин, “танлаган йўлимиздан ортга қайтмайслигимизни” айтди.
“Ҳар бир кун – бу имконият, ҳар бир кун – бу келажак пойдевори” деган шиор бугундан бошлаб ҳаётимиз қоидасига, ҳар қайси раҳбарнинг, барча халқ ноиблари, вазир ва ҳокимларнинг кундалик фаолият дастурига айланиши шарт”, — деди давлат раҳбари.
Изоҳ (0)