Фарғонада экспертиза хулосасини ижобий қилиш эвазига 2 миллион сўм пора сўраган шифокорга суд ҳукми ўқилди, деб хабар беради ЎзА.
Маълум қилинишича, Фарғона шаҳрида давлат муассасасининг мансабдор шахси ўзига берилган наркология экспертизаларини ўтказиш ва хулосалар бериш, экспертиза ўтказилишини назорат қилиш каби ваколатлардан фойдаланиб, ноқонуний йўллар билан бойлик орттирмоқчи бўлган.
Марғилон шаҳар ИИБ ҳузуридаги тергов бўлими терговчиси Ғ.А.нинг иш юритувидаги жиноят иши бўйича фуқаро Х.А.га нисбатан чиқарилган қарорга асосан судга оид наркология экспертизаси тайинланган. Шифокор Н.А. ўз хизмат ваколатидан келиб чиқиб, суд наркология экспертизасидан ўтиш мақсадида келган Х.А.ни экспертиза кўригидан ўтказиб, уни гиёҳвандлик моддаси истеъмол қилишга ружу қўйганини, унга нисбатан мажбурий тиббий даволанишга муҳтожлиги ҳақида хулоса берилишини, агарда 2 миллион сўм пул берса экспертиза хулосасини ижобий ҳал қилиб беришини айтган.
Шундан кейин Х.А. томонидан ҳуқуқни муҳофаза қилувчи органларга берилган аризага асосан шифокор-нарколог хизмат хонасида кимёвий ишлов берилган 1,5 миллион сўмни олган вақтида ушланган.
Ҳолат юзасидан жиноят иши қўзғатилиб, тергов ҳаракатлари олиб борилган. Мазкур жиноят иши суд томонидан кўриб чиқилиб, судланувчи Н.А.га Жиноят Кодексининг 210-моддаси (пора олиш) 2-қисми “в” банди билан айбли деб топилиб, икки йил мансабдорлик ва моддий жавобгарлик лавозимларида ишлаш ҳуқуқидан маҳрум қилинган ҳамда Жиноят Кодексининг 57-моддаси қўлланиб, 3 йил 6 ой озодликдан маҳрум қилиш жазоси тайинланган.
Суд ҳукмидан норози бўлиб ёзган шифокор аёлнинг апелляция шикояти Фарғона вилояти суди жиноят ишлари бўйича судлов ҳайъати апелляция инстанциясида кўриб чиқилиб, суднинг ҳукми ўзгаришсиз қолдирилган.
Шифокорлар билан боғлиқ порахўрлик ҳолатлари
2022 йил январда Бухорода шифокор фуқарони ҳамшираликка ишга жойлаштириш эвазига ундан 1 000 доллар пора олаётганда ушланган эди. Бухорода шундай ҳолат 2021 йилнинг октябрида ҳам юз берганди. Шаҳардаги 3-сон поликлиника бош шифокори фуқарони ҳамшираликка ишга жойлаштириш эвазига аёлдан 600 АҚШ доллари олаётганида қўлга олинган.
Ўша йилнинг декабрида Ромитан туманидаги кўп тармоқли марказий поликлиникада фаолият юритиб келаётган шифокор ногиронлик нафақасини расмийлаштириб бериш эвазига фуқародан 500 АҚШ доллари олганида ушланганди.
2022 йилнинг февралида Қашқадарё вилояти Шаҳрисабз туман кўп тармоқли марказий поликлиникаси бош шифокори 2 минг доллар билан қўлга тушганди.
Изоҳ (0)