Францияда 27 июндан бери давом этаётган тартибсизликларда мингдан ортиқ дўкон ва 200 дан ортиқ савдо марказлари ёқиб юборилди ва талон-торож қилинди, деди Франциянинг иқтисодиёт, молия, саноат ва рақамли суверенитет вазири Бруно Ле Мер.
Вазирнинг БФМTV телеканалига айтишича, "тартибсизликлар пайтида 250 та банк идораси, 450 та тамаки дўкони, 200 та савдо марказлари ва 1 мингдан ортиқ дўконларга ҳужум уюштирилган".
Унга кўра, тартибсизликлар ҳаракатидан жабр кўрган тадбиркорлар ижтимоий ва солиқ тўловларини тўлаш муддатини кечиктиришлари мумкин бўлади. Шунингдек, мамлакат ҳукумати тадбиркорларга суғурта компаниялари билан боғлиқ муаммоларни ҳал қилишда ёрдам бериш ниятида.
Аввалроқ Франция полицияси тартибсизликларда иштирок этган 70 дан ортиқ кишини қўлга олгани маълум бўлган эди.
Тартибсизликлар 28 июнга ўтар кечаси Париж чеккасида бошланиб, кейин бутун мамлакат бўйлаб тарқалди. Бунга машина ҳайдаб кетаётган 17 ёшли ўсмирнинг полициячи талабига биноан тўхташдан бош тортгани ва отиб ўлдирилгани сабаб бўлди.
Ҳуқуқ-тартибот идоралари воқеанинг барча ҳолатларини аниқлаш учун тергов бошлади. Ўсмирни отган полициячи ҳибсга олинди. У қасддан одам ўлдиришда айбланмоқда.
Изоҳ (0)