Россия президенти Владимир Путин Нью-Деҳлида бўлиб ўтган Шанхай Ҳамкорлик Ташкилоти саммитида видеоалоқа орқали сўзлаган нутқида “Вагнер” исёни пайтида Россияни қўллаб-қувватлагани учун ташкилотга аъзо мамлакатларга миннатдорлик билдирди.
“Россия ташқи босим, санкциялар ва провокацияларга ишонч билан қаршилик кўрсатиб келди ва қаршилик кўрсатишда давом этади. Ҳозирги вазиятда ҳам мамлакатимиз барқарор ривожланишда давом этмоқда. Рус халқи ҳар қачонгидан ҳам жипслашди. Россия сиёсий доираларининг, бутун жамиятнинг бирдамлиги ва ватан тақдири учун юксак масъулияти қуролли исёнга уринишларга қарши бирлашган фронт сифатида яққол намоён бўлди. Фурсатдан фойдаланиб, Россия раҳбариятининг конституциявий тузум, фуқаролар ҳаёти ва хавфсизлигини ҳимоя қилиш борасидаги ҳаракатларини қўллаб-қувватлашини билдирган ШҲТ давлатларидан келган ҳамкасбларимга миннатдорлик билдирмоқчиман. Биз буни юксак қадрлаймиз”, – деди Россия президенти.
Владимир Путиннинг таъкидлашича, ҳозир Россияга нисбатан мисли кўрилмаган миқёсдаги санкциялар жорий қилинган. Унинг фикрича, бу чекловлар ноқонунийдир.
Шу билан бирга, Путин ШҲТ халқаро ҳуқуқ ва суверен давлатлар ўртасидаги ўзаро ҳурматга асосланган ҳамкорлик тамойилларига асосланган “ҳақиқатан ҳам адолатли дунё тартибини” шакллантириш тарафдори эканини таъкидлади.
Нью-Деҳли шаҳрида ШҲТ давлатлари раҳбарлари кенгашининг 23-саммити виртуал форматда бўлиб ўтмоқда. Учрашувда Эрон ШҲТга тўлиқ қабул қилинди. Шунингдек, ташкилотга аъзо давлатлар саммит давомида Беларуснинг ташкилотга аъзо бўлиш истаги тўғрисидаги меморандумни расмийлаштириши режалаштирилган. Ҳозирга қадар ШҲТ таркибига саккизта давлат кирар эди: Россия, Ҳиндистон, Қозоғистон, Қирғизистон, Хитой, Покистон, Тожикистон ва Ўзбекистон.
Изоҳ (0)