Янги Зеландия бош вазири Крис Хипкинс АҚШ президенти Жо Байденнинг Хитой раиси Си Цзиньпинни “диктатор” деб атаган гапларини қўллаб-қувватламайди. Бу ҳақда Reuters хабар берди.
Хипкинс Си Цзиньпинни “диктатор” деб ҳисобламаслигини айтди. Унинг қўшимча қилишича, ХХРдаги бошқарув шакли Хитой халқининг ўз танлови натижасидир, бошқа давлатлар бунга аралашмаслиги керак.
Аввалроқ расмий Пекин Байденнинг сўзларига жавоб қайтарган ва унинг баёнотини “очиқ сиёсий провокация” деб атаганди.
21 июнь куни Байден Калифорниядаги чиқишида Си Цзиньпин АҚШ ҳаво ҳудудида Хитой шарлари топилиб, уриб туширилганидан эсанкираб қолганини, чунки у Пекиннинг бу миссиясидан бехабар бўлганини айтган.
“Си Цзиньпин мен жосуслик аппарати бор ўша ҳаво шарини уриб туширганимдан жуда норози бўлганига сабаб — у шар ҳақида билмаган” — деди Байден. “Нима бўлаётганини билмаслик эса диктаторларга ёқмайди”.
18–20 июнь кунлари АҚШ Давлат котиби Энтони Блинкен Хитойда бўлди. Сафари давомида у ХХР ташқи ишлар вазири Син Ган, Хитой дипломатияси куратори Ван Йи, кейин эса Си Цзиньпин билан учрашди. Блинкен сўнгги беш йил ичида Хитойга ташриф буюрган энг юқори мартабали АҚШ расмийсига айланди. Томонлар суҳбат очиқ ва мазмунли ўтганини таъкидлади. Пекин бугунги кунда икки давлат ўртасидаги муносабатлар энг паст даражада эканини қайд этди.
Блинкен “жосус” шарлар мавзусини ўтмишда қолдиришни таклиф қилган ва Пекинга ташрифини АҚШ—Хитой муносабатларини барқарорлаштиришда муҳим қадам деб атаган.
Изоҳ (0)