Қирғизистон президенти Садир Жапаров Россия ва Қозоғистон билан фуқароларнинг шахсий маълумотларини алмашиш тўғрисидаги битимни маъқулловчи қонунни имзолади, деб хабар бермоқда президент матбуот хизмати. Россия ва Қозоғистон бу келишувни мос равишда 2021 ва 2022 йилларда ратификация қилган.
Ушбу келишувга кўра, уч мамлакат фуқаролари қуйидаги маълумотларини ўзаро алмашади:
- шахсни тасдиқловчи ҳужжатлар бўйича;
- битимда иштирок этувчи давлатларнинг фуқаролиги мавжудлиги ёки йўқлиги ҳақида;
- доимий ёки вақтинчалик яшаш ҳуқуқини берувчи ҳужжатларнинг бор-йўқлиги ҳақида;
- миграция рўйхатидан ўтказилгани ёки яшаш жойи бўйича рўйхатга олингани, шу жумладан учинчи давлат фуқаролари ва фуқаролиги бўлмаган шахслар ҳақида;
- мазкур давлатлар ҳудудига кириш ҳуқуқини берувчи визалар бериш ҳақида;
- фуқароларнинг кўчмас мулки бўйича;
- мулкка оид мажбуриятлари тўғрисида;
- шахсни маъмурий ёки жиноий жавобгарликка тортиш тўғрисида.
Қирғизистон президенти матбуот хизмати хабарига кўра, тегишли келишув 2020 йилда имзоланган. 2023 йил май ойи охирида уни ратификация қилиш тўғрисидаги қонун Қирғизистон парламенти томонидан қабул қилинган.
Битим Қирғизистон зарур “ички тартиб-қоидалар”ни бажаргач 30 кундан кейин кучга киради.
2023 йилнинг ёзига келиб Қирғизистонда юзни таниш тизими ишга туширилди, унинг ёрдамида маҳаллий ҳуқуқ-тартибот идоралари Мустақил Давлатлар Ҳамдўстлиги мамлакатларида қидирувда бўлган шахсларни аниқлайди. Ушбу тизим доирасида Россия ҳукумати Қирғизистонга 85 мингдан ортиқ одам ҳақидаги маълумотларни тақдим этди.
Тизим ишга тушган биринчи ўн кунликда республика ҳуқуқ-тартибот идоралари томонидан тўрт нафар чет эл фуқароси, жумладан, Россиядан келган фаоллар қўлга олинди. Бунгача Қирғизистон ҳукумати Россияда қотилликка уринишда айбланаётган урушга қарши фаол Алексей Рожковни Екатеринбургдаги ҳарбий комитетга “Молотов коктейли” улоқтиргани учун ҳибсга олган эди. Июнь ойи бошида фаол Россияга депортация қилингани маълум бўлди. Ҳозир у қамоқда.
Изоҳ (0)