Париж шаҳрида портлаш содир бўлди. Етти кишининг аҳволи оғир

Парижнинг бешинчи округида юз берган портлашдан кейин етти кишининг аҳволи оғир, яна тўққиз нафар инсон жароҳатланган, деб хабар бермоқда BFМTV.

Аввалроқ телеканал Парижнинг бешинчи округидаги портлашдан сўнг камида тўрт кишининг аҳволи оғир экани, дастлабки маълумотларга кўра, бир нечта уйнинг фасади қулагани, яна бир неча уй ёниб кетгани ҳақида хабар берган эди. 

Прокуратура маълумотларига кўра, портлаш сабаблари ҳозирча аниқланмаган. Гувоҳлар портлаш жойида кучли газ ҳидини сезишганини айтишган.

Ўт ўчирувчилар воқеа жойида ишлаётгани, полиция эса Вал-де-Грас касалхонаси атрофидаги секторни эвакуация қилаётгани хабар берилмоқда. Расмийлар фуқароларни ҳодиса юз берган ҳудуддан узоқроқ юришга чақирган.