Тунисда йўловчи поезди рельсдан чиқиб кетди. Бу ҳақда маҳаллий ТAP ахборот агентлиги хабар бермоқда.
Ҳодиса Туниснинг Ўрта Ер денгизи соҳилида жойлашган Сус провинциясида содир бўлган. Йўловчи поезди мамлакат пойтахтидан Габес туманига қараб йўлга чиққанди. Йўлда номаълум сабабларга кўра поезд рельсдан чиқиб кетган, натижада бир неча вагон ағдарилган.
Ҳодиса оқибатида қурбонлар ва жароҳатланганлар бор. Тунис Миллий темир йўл компанияси вакилларининг сўзларига кўра, икки киши ҳалок бўлган: улардан бири поезд машинисти, иккинчиси йўловчи. Шифокорлар 34 киши жароҳатланганини маълум қилди.
Таъкидланишича, ҳодиса сабаблари ҳақида тўлиқ ҳисобот кейинроқ эълон қилинади.
Шунга ўхшаш ҳодиса 2023 йил март ойида ҳам Тунисда содир бўлган эди. Ўшанда иккита поезднинг тўқнашиб кетиши натижасида 84 нафар фуқаро жабрланган.
Изоҳ (0)