Yangi Zelandiya bosh vaziri Kris Xipkins AQSH prezidenti Jo Baydenning Xitoy raisi Si Szinpinni “diktator” deb atagan gaplarini qo‘llab-quvvatlamaydi. Bu haqda Reuters xabar berdi.
Xipkins Si Szinpinni “diktator” deb hisoblamasligini aytdi. Uning qo‘shimcha qilishicha, XXRdagi boshqaruv shakli Xitoy xalqining o‘z tanlovi natijasidir, boshqa davlatlar bunga aralashmasligi kerak.
Avvalroq rasmiy Pekin Baydenning so‘zlariga javob qaytargan va uning bayonotini “ochiq siyosiy provokatsiya” deb atagandi.
21-iyun kuni Bayden Kaliforniyadagi chiqishida Si Szinpin AQSH havo hududida Xitoy sharlari topilib, urib tushirilganidan esankirab qolganini, chunki u Pekinning bu missiyasidan bexabar bo‘lganini aytgan.
“Si Szinpin men josuslik apparati bor o‘sha havo sharini urib tushirganimdan juda norozi bo‘lganiga sabab — u shar haqida bilmagan” — dedi Bayden. “Nima bo‘layotganini bilmaslik esa diktatorlarga yoqmaydi”.
18–20-iyun kunlari AQSH Davlat kotibi Entoni Blinken Xitoyda bo‘ldi. Safari davomida u XXR tashqi ishlar vaziri Sin Gan, Xitoy diplomatiyasi kuratori Van Yi, keyin esa Si Szinpin bilan uchrashdi. Blinken so‘nggi besh yil ichida Xitoyga tashrif buyurgan eng yuqori martabali AQSH rasmiysiga aylandi. Tomonlar suhbat ochiq va mazmunli o‘tganini ta’kidladi. Pekin bugungi kunda ikki davlat o‘rtasidagi munosabatlar eng past darajada ekanini qayd etdi.
Blinken “josus” sharlar mavzusini o‘tmishda qoldirishni taklif qilgan va Pekinga tashrifini AQSH—Xitoy munosabatlarini barqarorlashtirishda muhim qadam deb atagan.
Izoh (0)