БМТ иқлим конференциясида қатнашган аёллар делегацияси эркак ҳамкасблари томонидан шилқимликка учрагани ҳақида шикоят қилди

Бирлашган Миллатлар Ташкилотининг 2022 йилги COP27 иқлим конференциясида қатнашган аёл делегатлари эркак ҳамкасбларининг таъқиблари, ҳақоратлари ва шилқимлигидан шикоят қилди, деб ёзмоқда The Financial Times.

Ўтган йилги конференцияда таъқибга учраганлардан бири Мексика делегацияси раҳбари Камила Сепеда эди. У журналистларга, бошқа нарсалар қатори, эркак делегатлардан “номақбул хабарлар” олганини айтди.

Сепеда бу ҳақда дарҳол хабар бермаган, лекин бошқа аёллар ҳам БМТ музокараларида таъқибларга дучор бўлаётгани сабабли бу ҳақда гапиришга қарор қилган. Мексика делегацияси раҳбарининг сўзларига кўра, ташкилот бундай кўнгилсизликларнинг “олдини олиш чоралари”ни кўриши керак.

2022 йилги иқлим конференцияси воқеалари билан таниш бўлган яна бир киши The Financial Timesъга Сепедадан ташқари бошқа аёллар ҳам шилқимликка учраганини айтди.

Ушбу шикоятлар фонида конференция иштирокчиси бўлган 20 га яқин давлат БМТга мактуб йўллади. Мексика, АҚШ, Буюк Британия, Германия, Перу, Канада ва бошқа давлатлар ташкилотчиларни “музокарачиларга қандай муносабат кўрсатилаётганига” эътибор қаратишга ҳамда конференцияда “хавфсиз ўринни” таъминлашга чақирди.

Нашрга кўра, Германиянинг Бонн шаҳрида бўлиб ўтаётган COP28 га тайёргарлик тадбирларида ҳам безорилик ҳолатлари кузатилган. The Financial Times нашрига икки манбанинг айтишича, бир қанча безорилик шикоятлари Мексика делегациясидаги аёллар томонидан берилган, эркаклар “уларга нисбатан ишончни пасайтиришга” уринган.