Birlashgan Millatlar Tashkilotining 2022-yilgi COP27 iqlim konferensiyasida qatnashgan ayol delegatlari erkak hamkasblarining ta’qiblari, haqoratlari va shilqimligidan shikoyat qildi, deb yozmoqda The Financial Times.
O‘tgan yilgi konferensiyada ta’qibga uchraganlardan biri Meksika delegatsiyasi rahbari Kamila Sepeda edi. U jurnalistlarga, boshqa narsalar qatori, erkak delegatlardan “nomaqbul xabarlar” olganini aytdi.
Sepeda bu haqda darhol xabar bermagan, lekin boshqa ayollar ham BMT muzokaralarida ta’qiblarga duchor bo‘layotgani sababli bu haqda gapirishga qaror qilgan. Meksika delegatsiyasi rahbarining so‘zlariga ko‘ra, tashkilot bunday ko‘ngilsizliklarning “oldini olish choralari”ni ko‘rishi kerak.
2022-yilgi iqlim konferensiyasi voqealari bilan tanish bo‘lgan yana bir kishi The Financial Times’ga Sepedadan tashqari boshqa ayollar ham shilqimlikka uchraganini aytdi.
Ushbu shikoyatlar fonida konferensiya ishtirokchisi bo‘lgan 20 ga yaqin davlat BMTga maktub yo‘lladi. Meksika, AQSH, Buyuk Britaniya, Germaniya, Peru, Kanada va boshqa davlatlar tashkilotchilarni “muzokarachilarga qanday munosabat ko‘rsatilayotganiga” e’tibor qaratishga hamda konferensiyada “xavfsiz o‘rinni” ta’minlashga chaqirdi.
Nashrga ko‘ra, Germaniyaning Bonn shahrida bo‘lib o‘tayotgan COP28 ga tayyorgarlik tadbirlarida ham bezorilik holatlari kuzatilgan. The Financial Times nashriga ikki manbaning aytishicha, bir qancha bezorilik shikoyatlari Meksika delegatsiyasidagi ayollar tomonidan berilgan, erkaklar “ularga nisbatan ishonchni pasaytirishga” uringan.
Izoh (0)