Бразилиялик актриса Луселия Сантус иштирокидаги “Канизак Изаура” сериали кўплаб томошабинларни экран қаршисига тўплай олди ва ундаги қаҳрамонларнинг машҳурликка эришишига сабаб бўлди. Лойиҳада бош ролни — канизак Изаура образини гавдалантирган актриса Луселия Сантуснинг тақдири қандай кечгани эса мухлислар учун қизиқ бўлса керак.
“Канизак Изаура” сериали 1976 йилда суратга олинган. Бу Совет Иттифоқида намойиш этилган биринчи хорижий сериал эди. Қизиғи шундаки, ўшандан бери канизак Изаура машҳур исмга айланди, одатда кимдир кўп ва қаттиқ меҳнат қилишига тўғри келса, шундай дейишади. Унда бош ролни ижро этган актриса ўша даврнинг энг машҳур актрисалари қаторига киритилди, Луселия Сантус 2023 йилнинг 20 май санасида 66 ёшни қарши олди.
Сериал суратга олинган вақтда актриса жуда ёш бўлган. Луселия севган инсони билан узоқ кутилган бахтни топгунга қадар кўп синовлардан ўтиши керак бўлган канизакнинг тақдири ҳақидаги теленовеллага таклиф қилинганида эндигина 19 ёшга кирган эди.
Бугунги кунда актриса фаол ҳаёт тарзини олиб боради. Ижтимоий тармоқлардаги маълумотлардан Луселиянинг тоғларда сайр қилишни, пляжда дам олишни, дўстлари билан учрашишини ва турли хил базмларни яхши кўришини билиб олиш мумкин. Актриса буддизмга эътиқод қилади ва ёга билан шуғулланади.
Сантос сиёсий жиҳатдан ҳам фаол. У президент Луиз Инасио Лулу да Сильвани қўллаб-қувватлайди. Луселия парламентга ўзи номзодини қўйган бўлса-да, муваффақиятсизликка учраган.
Актриса бразилиялик дирижёр Жон Нешлинг билан турмуш қурган. Жуфтликнинг Педро исмли ўғли бор, у актёрлик соҳаси бўйича таҳсил олди. Луселия Каролина исмли қизалоқнинг бувиси.
Изоҳ (0)