Ўрта ёш вакиллари актёр Алишер Ҳамроевни яхши танишади. "Дилхирож", "Нотаниш полвон", "Маржона", "Ёдгор" каби фильмлардаги роллари билан мухлислар эътиборига тушган актёр 1976 йилнинг 2 январь санасида Бухоро вилоятининг Когон шаҳрида туғилган.
У ёшлигидан санъатга қизиққани боис мактабни тамомлаб, Тошкентга келган ҳамда Ўзбекистон давлат санъат ва маданият олийгоҳига ўқишга кириб, драма ва кино актёрлиги бўлимида таҳсил олган. Олийгоҳни тамомлагач, актёрлик фаолиятини Ўзбек Миллий академик драма театрида бошлаган. Ушбу театрда ишлаш давомида у, ўнлаб спектаклларда иштирок этган.
Актёр 2005 йил 29 ёшида оламдан ўтган. Алишер Ҳамроевнинг яқинлари “Дарё”га берган интервьюсида актёр ва унинг рафиқасининг вафот этиш сабаби ҳақида гапириб берди.
“Синглим онкология касалликлари шифохонасида ётганида Алишерни тушимда кўрдимъ деган”
“Аслида куёвимиз 2004 йилда касал бўлган ва 2005 йилда оёғидан саратонга чалинганлиги сабабли вафот этган. Синглим эса бу ҳолатдан стрессга тушиб қолган, орадан уч йил ўтиб у ҳам вафот этди. Икки нафар фарзанди билан Тошкентга келган эди, қийналган, сабаби улардан ҳеч ким хабар олмаган. Вақт ўтиб оққон касаллигига чалинган, кейин яна болаларини олиб Бухорога кетган.
Яна қайтиб Тошкентга олиб келганимиздан кейин 10 кун даволаниб шу ерда вафот этди. Болалари Бухорода эди, дадамнинг уйига олиб бориб ўша ердан чиқарганмиз. Синглим онкология касалликлари шифохонасида ётганида Алишерни тушимда кўрдим, у менга сени қийналишингни хоҳламайман, ўзим билан олиб кетаман деб айтди. Биз ҳайрон қолдик, синглим билан уйга бориб “ис” чиқардик. Унга ҳаммаси яхши бўлади, тушга нималар кирмайди, дедик. Бироқ орадан 10 кун ўтиб вафот этди”, — дейди Гулойим Маҳмудова.
“Дадам иштирок этган фильмлар уларни эслатиб туради”
“Дадам вафот этганида тахминан икки-уч ёш бўлганман. Улар билан боғлиқ жонли хотираларим кам. Дадамни фақат актёр сифатида билганман. Улар билан боғлиқ хотираларим бўлмаса ҳам, миямда шуни гавдалантирганман. Дадам иштирок этган фильмлар уларни эслатиб туради. Нечта инсон билан гаплашган бўлсам, даданг зўр инсон эди, деб айтишган. Ҳеч қачон улар ҳақида ёмон гап эшитмаганман, ҳар доим ижобий фикрларни эшитиб келганман”, — дейди актёрнинг қизи Мадина Ҳамроева.
“Дадангдаги актёрлик қобилияти сенинг қонингда бор, дейишарди”
“Мактабдаги тадбирларда иштирок этган вақтим ўқитувчим менга асосий ролларни берарди. Саҳна кўриниши бўлса Алишер Навоий ёки Ҳусайн Бойқаронинг диалогларини гапиртирарди. Нимага ундай қилишаётганини сўрасам, сен ролларни яхши чиқариб беришинг керак, чунки дадангдаги актёрлик қобилияти сенинг қонингда бор, дейишарди. Шу нарса масъулиятни қабул қилишимга ёрдам берган.
Турли хил нарсаларни синаб кўриш мен учун қизиқ бўлган. Мени холам тарбия қилган, мулоқотга тез кириша олмайман. Сабаби холам бўш вақтимни бошқалар билан ўтказишимга қаршилик қиларди. Улар кўп ўқишимни, ўз устимда ишлашим кераклигини айтарди”, — дейди
Актёрнинг яқинлари билан бўлган суҳбатни қуйида тўлиқ томоша қилишингиз мумкин.
Изоҳ (0)