Ижтимоий тармоқларда юқори об-ҳаво ҳарорати таъсирида Тошкент шаҳрининг айрим ҳудудларига ўрнатилган светофор қурилмалари фаолиятида носозликлар кузатилаётгани ҳақида хабарлар тарқалди. “Дарё” шу муносабат билан Тошкент шаҳар Ички ишлар бош бошқармаси билан боғланиб, ҳолат юзасидан изоҳ олди.
Унга кўра, айрим светофорлар ишламаётганига иссиқ об-ҳавонинг алоқаси йўқ.
“Светофор ишламаслиги об-ҳаво шароити билан боғлиқ эмас. Айрим ҳудудларда электр тармоғи билан боғлиқ муаммолар бўлгани учун светофор ишламаслиги ҳолати кузатилмоқда”, — дейди ИИББ ахборот хизмати раҳбари Нилуфар Мадиева.
Бундан ташқари, тармоқларда иссиқ ҳарорат оқибатида светофор эриб кетгани акс этган сурат тарқалганди. Нилуфар Мадиева бу сурат фейк эканини айтиб, ҳозиргача бу бўйича ҳеч қандай мурожаат келиб тушмаганини билдирди.
“Тошкент шаҳрида светофор қурилмаси эриб тушгани ҳақида хабар келиб тушмаган. Расмдаги ҳолат Тошкент шаҳрида юз бермаган, бу расм фейк. Светофор қурилмаси иссиққа ва совуққа чидамли материалдан ясалган”, — дея тушунтирди у.
Изоҳ (0)