Тошкент вилоятининг Бўстонлиқ туманида ўқувчи қиз расмга тушаётганда Угам дарёсига тушиб кетиб, вафот этди. Бу ҳақда “Миллий” телеканалининг “Миллар” дастурида хабар қилинди.
Унда айтилишича, воқеа 11 июнь куни юз берган. Олмазор туманидаги мактабларнинг бирида 9-синф ўқувчилари мактаб ўқитувчиси билан тоққа дам олгани чиққан. Марҳума қиз расмга тушиш учун тош устига чиққан ва эҳтиётсизлик сабаб сувга тушиб, оқиб кетган. Бир неча дақиқалардан сўнг, унинг жонсиз танаси сувдан топилиб, олиб чиқилган.
“Қизим синфдошлари билан Нанайга бораётганини айтганида роса жаҳлим чиқди. Нима қиласан, мактаб ўқувчилари тоққа бориб дедим. Ота-оналар кенгаши билан гаплашсам, хотиржам бўлинг, олдида ўқитувчилари бор. Хоҳласангиз ўзингиз ҳам боринг, деб айтди. Бораман деб қўймади. Кўнглим бўлмай жўнатдим”, — деган қизнинг онаси.
Хабарда айтилишича, мактаб директори тоққа саёҳат ўқувчиларининг ота-оналари ташаббуси билан ташкил қилинган. Саёҳатга синфдан фақат 6 нафар ўқувчи чиққан. Директор, шунингдек, ўқувчилар тоққа якшанба куни чиққанини, мактаб имтиҳонлари бир неча кун олдин тугаб, ўқитувчи ва ўқувчиларга таътил берилганини билдириб ўтган.
Ҳозирда ҳолат юзасидан Бўстонлиқ туман прокуратураси томонидан терговга қадар текширув ҳаракатлари олиб борилмоқда. Текширув ишлари вилоят прокуратураси томонидан назоратга олинган.
Изоҳ (0)