Андижон вилоятида фарзандининг хатоси сабабли газ баллон портлаши оқибатида аёл ёниб, ҳалок бўлди. Бош прокуратура “Дарё”га ҳолат юзасидан маълумотларни очиқлади.
Ҳолат 8 июнь куни соат тахминан 16:20 ларда Андижон шаҳар, “Ёрбоши” МФЙ, Соҳил кўчаси, 15-уйда содир бўлган. 1952 йилда туғилган М.К. ва 1996 йилда туғилган Ж.Х. яшаш хонадонида мавжуд суюлтирилган газ баллонидан чақнаш юз бериши натижасида тан жароҳати олиб, РСНTTЁИМ Андижон филиали тез тиббий ёрдам бўлимига олиб келинган.
Кўрсатилган тиббий муолажаларга қармасдан, фуқаро М.К. 9 июнда тез тиббий ёрдам бўлимида вафот этган. Дастлабки тиббий маълумотга кўра, М.К.да алангадан 1-2-3 АБ даражада танасининг 100 фоиз куйиши, ЕУНЙК 2-даражали куйиши ҳасталиги, шок даври ўта оғир даражали куйиш шоки, Х.Ж.да эса алангадан 1-2-3 АБ даражада танасининг 80 фоиз куйиши, ЕУНЙК 2-даражали куйиши ҳасталиги, шок даври ўта оғир даражали куйиш шоки каби жароҳатлар аниқланган.
Воқеа жойида ёнғин натижасида куйган нарса ва буюмлардан наъмуналар олиниб, ёнғин келиб чиқиш сабабини аниқлаш мақсадида ёнғин-техникавий ва уларга етказилган тан жароҳатлари даражасини аниқлаш мақсадида суд-тиббий экспертизалари тайинланган.
Шунингдек, ФВВ Андижон вилояти бошқармаси, “Ҳудудгаз Андижон” газ таъминоти филиали ва Андижон шаҳар Камбағалликни қисқартириш ва бандлик бўлимига хизмат текшируви тайинланган.
Ҳолат бўйича М.К. ва Х.Ж.нинг оила аъзолари, шаҳар ФВБ бўлим ходимлари ва воқеага алоқадор бўлган барча фуқаролардан батафсил тушунтириш хатлари олинган.
Терговга қадар текширув давомида Андижон шаҳар, “Ёрбоши” МФЙ, Соҳил кўчаси, 15-хонадоннинг яшаш уйи очиқ айвонида 20 литр ва 50 литр ҳажмли суюлтирилган газ баллонлари тўпланиб, уй эгасининг фарзанди Ҳ.Ж. томонидан Андижон шаҳар газ таъминоти бўлимида рўйхатда бўлмаган 20 литр ва 50 литр ҳажмли газ баллонларидан очиқ айвонга газ сизиб чиққанини сезмасдан газ баллонларини бир-бирига тўқнаштириши натижасида чақнаш ҳодисаси содир бўлгани қайд қилинган.
Мазкур ҳолат юзасидан Андижон шаҳар прокуратураси томонидан терговга қадар текширув ҳаракатлари олиб борилмоқда.
Изоҳ (0)