Ўзбекистонда 2023 йил 1 январдан қўшилган қиймат солиғи (ҚҚС) 15 фоиздан 12 фоизга пасайтирилди. Бунинг натижасида давлат бюджетига қарийб 14 триллион сўм маблағ тушмай қолиши прогноз қилинган.
Кеча, 14 июнь куни бўлиб ўтган Олий Мажлис қонунчилик палатаси йиғилишида Иқтисодиёт ва молия вазири Шерзод Кудбиевнинг давлат бюджетининг ва давлат мақсадли жамғармалари бюджетларининг 2022 йилдаги ҳамда 2023 йилнинг биринчи чорагидаги ижроси тўғрисидаги ҳисобот тингланди. Вазирнинг айтишича, ҚҚС пасайишига қарамай жорий йилдаги солиқ ва божхона тушумлари ўсган.
“Қўшилган қиймат солиғи пасайтирилишига қарамасдан жорий йилнинг 1-чорагида давлат бюджетига 17,4 триллион сўм миқдорида солиқ ва божхона тушумлари келиб тушди. Бу ўтган йилга нисбатан 1,6 триллион сўм ёки 10 фоизга кўп. Солиқ тўловчиларга 4,6 триллион сўм миқдорида ҚҚС қайтариб берилди”, — деди вазир.
Шерзод Кудбиевнинг қўшимча қилишича, январь–март ойларида мамлакат ялпи ички маҳсулоти 199 триллион сўм ташкил этиб, 2022 йилнинг мос даврига нисбатан 5,5 фоизга ўсишни кўрсатган.
“Бунда қурилиш 4,5 фоиз, саноат 4,1 фоиз, бозор хизматлари соҳаси 10,9 фоизга ўсган. Ташқи савдо айланмаси ҳажми 15 миллиард доллрани ташкил этиб, 2022 йил чорак кўрсаткичига нисбатан 11,9 фоизга ортган. Бунда экспорт 2,6 фоизга камайиб, 6 миллиард долларни, импорт 23 фоизга ортиб, 9 миллиард долларни ташкил этди”, — деди у.
Маълум қилинишича, 1-чоракда давлат бюджети давромадлари 47,3 триллион сўм бўлиб, белгиланган прогноздан 102,8 фоизга ўсган ва 1,3 триллион ошириб бажарилган. 2022 йилнинг мос даврига нисбатан 5,5 триллион сўм кўп маблағ бюджетга келиб тушган.
Январь–март ойларида давлат харажатлари 59 триллион 33 миллирд сўмни (ЯИМга нисбатан 29,7 фоиз) ташкил этган. Бюджет ташкилотлари қарийб 20,7 триллион сўмлик иш ҳақи ва унга тенглаштирилган тўловлар билан молиялаштирилган. Ижтимоий соҳалар харажатлари жами давлат бюджетининг 47,8 фоизи (28 триллион сўм) сарфланган.
Изоҳ (0)