Хитой Халқ Республикаси раиси Си Цзиньпин бугун 70 ёшни қаршилади. Шу муносабат билан “РБК” сиёсатчининг ҳокимиятга келиши ва оилавий ҳаётига оид ўнта фактни тўплади.
70 ёш. Си Цзиньпин1953 йил 15 июнь куни Пекинда таниқли инқилобчи ва сиёсий арбоб Си Чжунсюн оиласида туғилган. Отаси турли лавозимларда, шу жумладан 1959 йилдан 1962 йилгача ХХР Давлат кенгаши раисининг ўринбосари бўлиб ишлаган. Онаси Си Син бутун умри давомида Хитой Коммунистик партияси Марказий қўмитасининг Марказий партия мактабида ишлаган. Улар тўрт фарзандни вояга етказган.
Си Цзиньпин (биринчи қатор марказда) онаси Си Син ва отаси Си Чжунсюн (орқа қатор марказдада), укаси ва опа-сингиллари билан, 1960 йил
1962 йилда отаси ҳибсга олиниб, мол-мулки мусодара қилинганида Си деярли ўн ёшда эди. Қамалган одамнинг ўғли бўлишига қарамай, 1966 йилда у ўзи ўқиётган мактабнинг Қизил гвардиясига қўшилади. Ўша пайтда “Раис Мао душманлари”нинг оила аъзоларини таъқиб қилиш бошланганидан сўнг, Си сўроқ учун олиб кетилади, кейин колонияга жўнатилади, у ердан кўп маротаба қочиб кетади ва охир-оқибат уйсиз болага айланади.
Си Шенси провинциясининг Фупинг округи шаҳарчасига бувисиникига кўчиб ўтганида 15 ёшда эди.
1973 йилда, Си 20 ёшга тўлганида, сургун қилинган пекинликларга пойтахтдаги нуфузли Sinxua университетига сиртдан кириш имтиҳонларини топширишга рухсат берилади. Си кимё йўналишига киради. 1990 йилларда у шу университетнинг Гуманитар фанлар факультетида “марксистик назария ва ғоявий-сиёсий тарбия” йўналиши бўйича аспирантурада ўқийди.
Си Коммунистик партияга ўнинчи уринишда кирган.
Си Цзиньпин 17 йил давомида Тайванга қўшни Фуцзян қирғоқ провинциясида ишлаган. У 1985 йилда қадимий Сямен шаҳрида иш бошлаган, у ерда мамлакатдаги биринчи эркин иқтисодий зоналардан бири Си Цзиньпин даврида ишга туширилган ва фаол ривожлана бошлаган. Сиёсатчи провинциянинг энг қашшоқ туманларидан бири — Ниндеда, сўнг провинция маркази Фучжоуда ишлаган.
Си 2007 йилнинг мартидан октябригача Шанхайда саккиз ой фаолият юритган, шундан сўнг у ХХР раислигига курашнинг сўнгги босқичини бошлаш учун истеъфога чиққан. У 2008 йил март ойида Хитой Халқ Республикаси вице-президенти, 2013 йил март ойида эса раиси бўлди. Си ўз атрофига, асосан, Фуцзян ва Шанхайда бирга ишлаган одамларини тўплади.
Уч муддат. 2023 йил 10 март куни Си Цзиньпин тарихда илк бор учинчи марта Хитой президенти этиб сайланди. Мамлакат раҳбариятининг ротация тартибини бузиш учун Конституцияни ўзгартириш керак эди — бу иш 2018 йилдаёқ амалга оширилган.
Си Цзиньпин икки марта оила қурган. Биринчи рафиқаси ХХРнинг Буюк Британиядаги элчиси бўлган юқори мартабали дипломатнинг қизи Ке Линлин эди. Рафиқаси ундан Лондонга бирга кетишни талаб қилган, аммо Си рад этган ва улар ажрашган. Си иккинчи марта 1987 йилда турмуш қурди — у хитойлик эстрада юлдузи, Хитой Халқ озодлик армиясининг ашула ва рақс ансамбли солисти Пен Лиюанга уйланди. Си ХХР раиси бўлганидан кейин рафиқаси ўз чиқишларини тўхтатди ва армия Бадиий академиясининг раҳбари бўлди.
Ягона фарзанди. Си ва Пеннинг никоҳида бир нафар фарзанд — 1992 йилда туғилган қизи Си Минцзе бор. У АҚШдаги Гарвард университетида олий таълимни олган, омма эътиборидан йироқ ҳаёт кечиради.
Изоҳ (0)