Оқ уй Эроннинг ядро қуролини қўлга киритиш эҳтимолини камайтириш ҳамда Эрон қамоқхоналаридаги америкаликларни озод қилиш учун Теҳрон билан яширинча музокараларни давом эттирмоқда. Бу ҳақда The Wall Street Journal манбаларга таяниб хабар берди. Уларнинг айтишича, декабрь ойидан бери Уммон АҚШ ва Эрон ўртасида билвосита музокараларга воситачилик қилмоқда.
Халқаро санкциялар ва Эрон банкларининг SWIFT глобал тўлов тизимидан узиб қўйилиши фонида Теҳрон учун энг муҳими — музлатилган активларини блокдан чиқаришга эришиш. Газетанинг ёзишича, Эрон расмийлари америкалик маҳбусларни озод қилиш ва мамлакатда ядро қуроли йўқлигини исботлаш эвазига айнан шуни кутмоқда.
АҚШ президенти маъмурияти расман Эрон билан барча алоқаларни рад этиб келади, чунки бу Жо Байденнинг сайловолди кампаниясига путур етказиши мумкин, деб ёзади The Wall Street Journal.
Аввалроқ Бирлашган Миллатлар Ташкилоти Халқаро суди Эроннинг хорижий активларни музлатиш масаласида АҚШга қарши даъвосини қисман қаноатлантирган эди. Энди Вашингтон Теҳронга компенсация тўлаши керак.
Суд инстанцияси хулосасига кўра, Қўшма Штатлар Эроннинг хорижий активларини музлатиб, 1955 йилда мамлакатлар ўртасида тузилган дўстлик шартномаси бўйича ўз мажбуриятларини бузган. Шу билан бирга, Эрон ва АҚШ ўртасидаги муносабатлар 1979 йилги Ислом инқилобидан кейин душманлик тусини олган, АҚШ келишувдан фақат 2018 йилда — кўплаб санкциялар пакети киритилгандан кейин чиқишга қарор қилганди.
Суд Вашингтоннинг дўстлик келишувидан чиқмасдан туриб айрим Эрон компаниялари активларини музлатиб қўйгани, яъни “ноқонуний санкциялар” учун Теҳронга товон пули тўлаши ҳақида ҳукм чиқарди.
Изоҳ (0)