Шимолий африкалик муҳожирлар ўтирган қайиқ Греция қирғоқларида ағдарилиб кетди. Грециянинг ERТ телеканали хабарига кўра, камида 78 киши ҳалок бўлган.
100 дан ортиқ одам қутқариб олинди. Қайиқ бортида неча киши бўлгани номаълум. Халқаро миграция ташкилоти 400 га яқин одамни бўлган деб тахмин қилмоқда. Греция ҳукумати эса омон қолганларнинг сўзларига таяниб, бортда 700 га яқин муҳожир бўлганини таъкидламоқда.
Қайиқ тахминан 10 июнь куни Ливиядан Италияга йўлга чиққан. У Пилос шаҳри яқинидаги халқаро сувларда чўкиб кетган. Расмийларнинг фикрича, ҳодисага кеманинг ҳаддан зиёд кўп одамни олиб кетаётгани сабаб бўлган.
Ҳалокат юз берган ҳудудда қидирув-қутқарув операцияси давом этмоқда, бу ишга Соҳил Хавфсизлик хизмати ва фавқулодда ёрдам қайиқлари, ҳарбий фрегат, Ҳарбий-ҳаво кучлари вертолёти, дрон ва хусусий кемалар жалб қилинган.
Европага келаётган ноқонуний муҳожирлар денгизда ҳалок бўлмоқда
Шимолий Африка ва Яқин Шарқдан Европа Иттифоқи мамлакатларига боришга ҳаракат қилаётган муҳожирлар учун асосий манзил Греция ва Италия ҳисобланади. Уларнинг кўпчилиги хавфсизлик ускуналарисиз Ўрта Ер денгизини ҳаддан ортиқ юкланган қайиқларда кесиб ўтади.
2023 йил февралида Италия қирғоқларида Эрон, Покистон ва Афғонистондан келган муҳожирларни олиб кетаётган кема ҳалокатга учраган эди. Ўшанда камида 40 киши ҳалок бўлган.
Missing Migrants Project халқаро ташкилотига кўра, 2014 йилдан буён 27 мингга яқин одам Ўрта Ер денгизида ҳалок бўлган ёки бедарак йўқолган.
Изоҳ (0)