Айни вақтда Ўзбекистон Либерал-демократик партиясидан Ўзбекистон президентлигига номзод Шавкат Мирзиёев хоразмлик сайловчилар билан учрашув ўтказмоқда.
Номзод 2030 йилга қадар мактабгача таълимга бўлган эҳтиёж тўлиқ қопланиши ва қамров ҳозирги 79 фоиздан 100 фоизга етказилишини айтди.
“Шу мақсадда, қарийб 2 триллион сўм маблағ ҳисобига 500 га яқин янги боғчалар ташкил этилади. Келгуси етти йилда замонавий мактаблар барпо этиш, мавжудларининг қувватини ошириш ҳисобига қўшимча 90 минг ўқувчи ўрни яратилади.
Натижада, вилоятда ўқувчиси 30 нафардан кўп бўлган синфлар қолмайди”, — деб таъкидлади номзод.
Шавкат Мирзиёев аҳолининг замонавий уй-жойга ўсиб бораётган талабини қондириш мақсадида, 50 минг хонадонга эга 2 мингта кўп қаватли уйлар барпо этилишини айтди.
“Шу билан бирга, 2030 йилга қадар Урганч, Хива, Питнак шаҳарлари, Гурлан, Тупроққалъа, Ҳазорасп, Боғот, Хонқа ва Янгиариқ туманларидаги 1 миллион аҳоли сув таъминоти яхшиланади. Бунга 100 миллион доллар йўналтирилади”, — деб таъкидлади президентликка номзод.
Изоҳ (0)