Еврокомиссия раҳбари Урсула фон дер Ляйен, Италия бош вазири Жоржа Мелони ва Нидерландия бош вазири Марк Рютте 11 июнь, якшанба куни Тунис президенти Қайс Саид билан учрашди. Европалик сиёсатчиларнинг Шимолий Африка давлатига ташрифидан мақсад — Европага қочқинлар ва муҳожирлар оқимининг олдини олиш борасида расмийлар билан келишиб олиш эди.
Шартнома тузиш учун Еврокомиссия раҳбари Урсула фон дер Ляйен Тунисга “мустаҳкам ҳамкорлик” ва миллиард евродан ортиқ молиявий ёрдам ваъда қилди. ЕИ бу суммадан 150 миллион еврони ҳозироқ ажратиши мумкин, қолган 900 миллионини эса кейинроқ узоқ муддатли ёрдам сифатида тақдим этади, деб унинг сўзларидан иқтибос келтирган AFP ахборот агентлиги. Еврокомиссия раҳбари келишув июнь охирига режалаштирилган ЕИ саммити олдидан имзоланишини истамоқда.
Европа Иттифоқи бошқа Африка давлатлари билан ҳам худди шундай шартномалар тузган. Хусусан, иттифоқ қочқинлар ўтирган қайиқларни мунтазам равишда ушлаб қоладиган ва одамларни вақтинча сақлаш лагерларига жўнатадиган Ливия қирғоқ хавфсизлигинининг ишини қўллаб-қувватлайди. Қочқинлар ҳуқуқларини ҳимоя қилиш ташкилотлари ва фаоллар бундай лагерларни ғайриинсоний шароити учун танқид қилган. Шунингдек, муҳожирларга нисбатан тазйиқлар ва зўравонликлар қўлланилгани ҳақида хабарлар бор.
“Тунис Европанинг чегара полицияси ролини ўйнашга тайёр эмас”
Европа делегациясининг ташрифи арафасида Тунис президенти Қайс Саид муҳожирлар масаласида молиявий ёрдам зарурлигини, бироқ унинг мамлакати Европанинг чегара полицияси ролини ўйнамаслигини айтган эди.
Охирги ойларда Европа Иттифоқига Тунис орқали, жумладан, Африканинг бошқа давлатларидан ноқонуний кириб келаётганлар сони кескин ошган. Италия ички ишлар вазирлиги маълумотларига кўра, йил бошидан бери мамлакатга 53 800 дан ортиқ одам ҳимоя излаб қайиқда келган. Бу кўрсаткич ўтган йилнинг шу даврида келганлар сонидан қарийб ярим баравар кўп.
Изоҳ (0)