Хитой ядро каллаклари сонини 2027 йилга қадар 300 тадан 550 тага, 2035 йилгача эса 900 тагача ошириш ниятида, чунки АҚШ билан муносабатлар Тайван туфайли янада кескинлашиши кутилмоқда. Бу ҳақда Япониянинг Kyodo ахборот агентлиги манбаларига таяниб хабар берди.
Тегишли режа Хитой Халқ-озодлик армиясида ишлаб чиқилган бўлиб, у Хитой халқ республикаси раиси Си Цзиньпин томонидан маъқулланган. Агентлик суҳбатдошларига кўра, Хитой ҳарбийлари бу қарорга 2022 йилнинг ноябрь ойида келган.
Халқаро муносабатлар бўйича айрим экспертлар Хитой ядро қуролидан фойдаланмаслик тамойилидан воз кечиши мумкинлигини истисно қилмаяпти, дея қайд этди Kyodo.
Пентагоннинг январь ойи охирида Конгрессга тақдим этган ҳисоботига кўра, Хитой қитъалараро ракеталарни учирувчи ерусти қурилмалари сони бўйича аллақачон АҚШни ортда қолдирди, деб ёзади The Wall Street Journal манбаларга таяниб. Шу билан бирга, Қўшма Штатлардаги ракета ва ядро каллаклари ҳануз Хитойдагидан кўп ва Пекининг кўплаб учиргичлари бўш, Американинг сувости ва ҳаводан учириладиган ракеталари статистикага киритилмаган.
Стокгольм Халқаро тинчлик тадқиқот институти маълумотларига кўра, 2022 йил бошида Хитойда 350 та, АҚШда 5 428 та (1 744 таси учиргичларга жойланган), ядро каллаклари мавжуд эди.
Изоҳ (0)