Қашқадарё вилоятининг Яккабоғ туманида яшовчи блогер Элмурод Одилов дастлаб пилла пунктида калтаклангани, кейинчалик 15 суткага қамалгани ҳақида хабар берилганди. Вилоят ИИБ ахборот хизмати “15 суткага кетган” блогер фермерлар норозилигига сабаб бўлгани, фермерлар билан қарама-қаршиликка дуч келганини билдирганди. “Дарё” қўлга киритган ҳужжатларга кўра, яккабоғлик блогер аслида туман ҳокими ва ҳокимлик бош ҳисобчиси билан қарама-қаршиликка борган.
Жиноят ишлари бўйича Яккабоғ туман судининг 2023 йил 27 май куни чиқарган маъмурий жазо қўллаш ҳақидаги қарорида ёзилишича, блогер Элмурод Одилов туман ҳокими Лутфиддин Абдуллаев ҳамда ҳокимлик бош ҳисобчиси Суннатилла Раҳмонов билан тортишиб қолган.
Суд ҳужжатларида қайд этилишича, 35 ёшли блогер 2023 йилнинг 26 май куни кечки пайт соат тахминан 22:00 ларда туманнинг “Ибн Сино” маҳалласи Чинорли кўчасида жойлашган пилла маҳсулотларини сақлаш биносига бориб, у ердаги жараённи тасвирга ола бошлаган.
“Ундан нима сабабдан видеотасвирга олаётганини сўраган Суннатилла Раҳмоновни жамиятда юриш-туриш қоидаларини менсимасдан, оғизга олиб бўлмайдиган сўзлар билан ҳақорат қилган”, — дейилади суд ҳужжатида.
Ҳужжатларда ёзилишича, шунингдек, блогер ҳокимлик бош ҳисобчиси Суннатилла Раҳмоновни ҳақорат қилгани етмагандек, туман ҳокими Лутфиддин Абдуллаевнинг олдига бориб, ҳокимга “бирга-бир кўрасанми”, дея муштлашишга чақирган.
Судда сўз олган ҳоким буни тасдиқлаб, 2023 йилнинг 26 май куни кечки пайт соат 22:00 ларда пилла пунктида ҳокимлик ходимлари билан пилла режасини бажариш бўйича йиғилиш қилганини, йиғилишга кириб борган блогер унинг ёнига бориб, телефонида видео олиши давомида “туман ҳокими ноқонуний йиғилиш ўтказяпти, одамларни нима учун йиғиб ўтирибсан”, дея сансираб гапирганини айтган. Ҳокимнинг қўшимча қилишича, блогер уни муштлашишга чақириб, “мен билан яккама-якка чиқ”, деган. Шундан сўнг блогерни ИИБ ходимлари олиб кетган.
Суд ҳужжатларида ёзилишича, блогернинг ушбу қилмиши судда ўз исботини топган. Унинг ўзи ҳам қилмишига иқрор бўлган. Бироқ суд ҳужжатларида блогернинг фермерлар билан тортишгани, фермерларнинг ундан норозилиги ҳақида гап-сўз йўқ.
Эслатиб ўтамиз, Қашқадарё вилоят ИИБ ахборот хизмати блогернинг калтаклангани ҳақидаги хабарга муносабат билдириб, блогерни фермерлар ишига аралашиб, уларни ҳақорат қилганликда айблаганди. Ички ишлар вазирлиги ахборот хизмати раҳбари Шоҳрух Ғиёсов эса блогерни бировнинг пулини олиб, жамоатчилик назоратини суиистеъмол қилганликда, жанжал эвазига мавҳум манфаатларга эришмоқчи бўлганликда айблаганди.
Изоҳ (0)