Qashqadaryo viloyatining Yakkabog‘ tumanida faoliyat yurituvchi bloger Elmurod Odilov 15 sutkaga qamaldi. Bu haqda “Daryo”ga Ichki ishlar vazirligi axborot xizmati rahbari Shohrux G‘iyosov xabar berdi.
G‘iyosovning maʼlumot berishicha, birovning pulini olib, jamoatchilik nazoratini suiisteʼmol qilgan va janjal evaziga mavhum manfaatlarga erishmoqchi bo‘lgan bloger sud qarori bilan shu tarzda jazolangan.
Yakkabog‘lik bloger avvaliga pilla punktida Ichki ishlar xodimlari tomonidan ayovsiz kaltaklangani xabar qilingandi.
“Daryo” manbasi mazkur vaziyat haqida gapirar ekan “Urib telefonlarini sindirib tashlashdi. O‘sha yerda turganlar voqeani telefoniga oldi. Darvozadan olib chiqib urayotgani, sudrab, telefonlarini sindirayotgani o‘sha yerdagi kameraga ham tushgan bo‘lishi kerak”, degandi.
Bloger kaltaklangan paytda voqea joyida bo‘lgan boshqa manba esa IIB binosidan tonggi 04:00 da qo‘yib yuborilganini aytgandi.
“Voqeani ko‘rdingmi deb so‘rashdi. Men ichkaridagi voqeani ko‘rmaganimni aytdim va ertalab tongda uyga qaytdim”, — degandi manba.
“Daryo” muxbiri kaltaklangan bloger katta ehtimol bilan Yakkabog‘ tumani hokimi o‘rinbosari Fozil Xidirovning yoshlar yetakchilariga bergan topshiriqlari ijrosiga bag‘ishlangan yig‘ilishni yoritishga uringanini, biroq, to‘siqqa uchraganini aniqlagandi.
Fozil Xidirov tumandagi barcha yoshlar yetakchilariga murojaat qilib, bloger kaltaklangani aytilayotgan yig‘ilishga tayyorgarlik ko‘rib borishlari kerakligini, hamma safarbarlik chaqiruvchi rezerviga bir nafardan fuqaroni jalb qilib, shartnoma pulini to‘latib borishi kerakligini uqtirgani, buni qilmaganlar ishdan bo‘shatilishi mumkinligini aytgandi.
.jpg)
Tuman hokimi o‘rinbosarining bu qilmishi borasida tuman hokimligi hozircha maʼlumot bermadi. “Daryo” jurnalistining Fozil Xidirovga bog‘lanishga harakat qilgan barcha urinishlari besamar yakunlandi.
Izoh (0)