Qashqadaryo viloyatining Yakkabog‘ tumanida yashovchi bloger Elmurod Odilov pilla punktida IIB xodimlari tomonidan o‘lasi qilib kaltaklangani, ayni paytda izsiz yo‘qolgani aytilmoqda. Bu haqda “Daryo” manbalari xabar berdi.
Manbalarning aytishicha, bloger hokim boshchiligidagi masʼullarning pilla, safarbarlik chaqiruvi va soliq masalalariga bag‘ishlangan yig‘ilishni yoritishga uringan.
“Urib telefonlarini sindirib tashlashdi. O‘sha yerda turganlar voqeani telefoniga oldi. Darvozadan olib chiqib urayotgani, sudrab, telefonlarini sindirayotgani o‘sha yerdagi kameraga ham tushgan bo‘lishi kerak”, — deydi manba.
Manbaning taʼkidlashicha, tumanda doimiy ravishda shanba kuni shu tarzda yig‘ilish tashkil etiladi.
“Bizga pillaning, bir oylik armiya va soliqning nima aloqasi bor, bilmaymiz. O‘zimizning ishimiz qolib, shunaqa masalalarni muhokama qilib yuramiz”, — deydi MFY tizimida ishlovchi manba.
Bloger kaltaklangan paytda voqea joyida bo‘lgan yana bir manba IIB binosidan tonggi 04:00 da qo‘yib yuborilganini aytmoqda.
“Voqeani ko‘rdingmi deb so‘rashdi. Men ichkaridagi voqeani ko‘rmaganimni aytdim va ertalab tongda uyga qaytdim”, — deydi manba.
“Daryo” muxbirining aniqlashtirishicha, kaltaklangan bloger katta ehtimol bilan Yakkabog‘ tumani hokimi o‘rinbosari Fozil Xidirovning yoshlar yetakchilariga bergan topshiriqlari ijrosiga bag‘ishlangan yig‘ilishni yoritishga uringan. Biroq, to‘siqqa uchragan.
Aytilishicha, bloger 15 sutkaga qamalgan bo‘lishi mumkin. Bu haqda hozircha, rasmiy axborot yo‘q.
Izoh (0)