“Manchester Siti” yoki “Inter” hujumchisi tarixda qoladi. Bir mavsumda ham YCHL, ham JCH kubogini qo‘lga kiritgan to‘qqiz futbolchi haqida

Jahon Chempionati va Yevropa Chempionlar Ligasida g‘alaba qozonish har qanday futbolchining orzusi. “Manchester Siti” hujumchisi Xulian Alvares yoki “Inter” forvardi Lautaro Martines bu ikki sovrinni bir mavsumda qo‘lga kiritgan futbolchiga aylanishi mumkin. Hujumchilar 2022-yilning dekabr oyida Argentina terma jamoasi bilan Qatarda bo‘lib o‘tgan mundialda g‘olib chiqqandi. Ma’lumot uchun, aynan shu ikki futbolchi terma jamoada asosiy tarkib uchun raqobatlashgandi. Iyun oyida esa ular YCHL g‘olibligi uchun kurashadi.

Alvares yoki Martines bir mavsumda “mukammal dubl” qayd etgan birinchi futbolchi bo‘lmaydi. Futbol tarixida bunday natijaga to‘qqiz nafar o‘yinchi erishgan. Lekin ularning hech qaysisi Argentina terma jamoasi yoki “Manchester Siti” va “Inter” klublaridan bo‘lmagan. Quyida bir mavsum ichida ham mundial, ham YCHLda g‘olib chiqqan futbolchilar haqida so‘z boradi.

Zepp Mayer, Frans Bekkenbauer, Hans-Georg Shvartsenbek, Paul Braytner, Uli Hyoness va Gerd Myuller.

1974-yilda olti nafar germaniyalik futbolchi imkonsiz narsani amalga oshirdi. Ular ikki oy ichida ham Chempionlar Kubogida, ham Jahon Chempionatida zafar quchgan. Avvaliga darvozabon Mayer, himoyachilar Bekkenbauer, Shvartsenbek, Braytner, yarim himoyachi Hyoness va hujumchi Myuller “Bavariya” safida Chempionlar Kubogida g‘olib chiqdi.

Kubok yo‘li myunxenliklar uchun oson bo‘lib chiqmadi. Jamoa birinchi raunddayoq musobaqadan chiqib ketishi mumkin edi. “Bavariya” Shvetsiyaning “Otvidaberg” jamoasi ustidan penaltilar seriyasida g‘alaba qozongan. Ikkinchi raundda esa Drezdenning “Dinamo”siga qarshi aql-bovar qilmas o‘yinlar o‘tkazdi — o‘z maydonida 4:3, mehmonda esa 3:3 hisobi qayd etildi. Chorak finalda esa Bolgariyaning “SSKA” jamoasiga qarshi ishonchli o‘yinlar o‘tkazdi, yarim finalda Vengriyaning “Uypesht” klubini javob o‘yinidagi yirik g‘alaba evaziga dog‘da qoldirdi. Bryussel shahrida o‘tkazilgan “Atletiko”ga qarshi final o‘yinini esa qayta o‘tkazishga to‘g‘ri keldi, chunki jamoalar 1:1 hisobida durang o‘ynagandi. E’tiborlisi, Shvartsenbek 120-daqiqadagi goli bilan “Bavariya”ni mag‘lubiyatdan qutqarib qolgandi. Myunxenliklarning haqiqiy triumfi ikkinchi o‘yinda sodir bo‘ldi. Klub Hyoness va Myullerning dubllari evaziga “Atletiko”ni 4:0 hisobida mag‘lub etdi.

1974-yilgi Jahon Chempionati GFRda bo'lib o‘tdi va bu vazifani osonlashtirdi. Birinchi bosqichda GDR, Chili va Avstraliyani mag‘lub etdi, ikkinchi bosqichda esa Polsha, Shvetsiya va Yugoslaviya terma jamoalari ustidan g‘alaba qozondi. Myunxen shahrida o‘tkazilgan Niderlandiyaga qarshi final omadsiz boshlandi. Lolalar yurti vakillari ikkinchi daqiqadayoq penaltidan hisobni ochdi. Tanaffusgacha Braytner va Myullerning gollari nemislarga hisobda oldinga chiqib olishga yordam berdi. Uchrashuv 2:1 hisobida yakunlandi va GFR jahon chempioniga aylandi.

Bekkenbauer GFR terma jamoasining ham, “Bavariya”ning ham sardori edi. U mamlakatda 1974-yilning eng yaxshi futbolchisi deb tan olindi. Shunga qaramay “Oltin to‘p” uchun kurashda Yohan Kroyffga mag‘lub bo‘ldi. Myuller esa sakkizta gol bilan Chempionlar Kubogi to‘purari bo‘lgandi.

Kristian Karambyo

Kristian Karambyo Yangi Kaledoniyada tug‘ilgan, Fransiya terma jamoasida o‘ynagan va faoliyatidagi yulduzlik onlarini Madridda o‘tkazgan. Yarim himoyachi 1998-yilda avvaliga “Real Madrid” bilan Chempionlar Ligasida, keyin esa “uchranglilar” bilan Jahon chempionatida g‘olib chiqqan.

“Real Madrid” Karambyoni 1998-yilning yanvarida “Sampdoriya”dan sotib olgan. Kristian Chempionlar Ligasi pley-off bosqichidagi barcha o‘yinlarni asosiy tarkibda boshlagan va ilk uchta o‘yinda (“Bayer”ga qarshi chorak finalning ikki o‘yinida va “Borussiya D”ga qarshi yarim finalning birinchi uchrashuvida) gol urgan. “Real” 1:0 hisobida g‘alaba qozongan “Yuventus”ga qarshi final o‘yinida 90 daqiqa maydonda harakat qilgan.

Bir oydan keyin yarim himoyachi Fransiya mezbonlik qilgan Jahon Chempionatida ishtirok etgan. Biroq Kristian chorak finalgacha zaxira o‘yinchisi bo‘lgan. Yarim finalda esa jarohat tufayli 30-daqiqada almashtirilgan. Shunga qaramay Braziliyaga (3:0) qarshi final uchrashuvida 60 daqiqaga yaqin maydonda harakat qilgandi.

Roberto Karlos

Himoyachi Roberto Karlos klublar o‘rtasidagi eng qimmatli Kubokni “Real Madrid” safida 2001/02-yilgi mavsumda qo‘lga kiritgan. Bir yarim oy o‘tib esa Braziliya terma jamoasi bilan jahon chempioni bo‘lgan.

Roberto Karlos u paytda 30 yoshda edi va faoliyatidagi eng yaxshi vaqtlarini o‘tkazayotgandi. “Real” Chempionlar Ligasining birinchi bosqichida “Roma”, “Lokomotiv” va “Anderlext” joylashgan guruhdan o‘tgan bo‘lsa, ikkinchi bosqichda “Panatinaikos”, “Sparta” va “Portu”ni dog‘da qoldirdi. Chorak finalda “Bavariya”, yarim finalda esa azaliy raqib “Barselona” mag‘lub etildi. Finalda esa “qaymoqranglilar” “Bayer” ustidan 2:1 hisobida g‘alaba qozondi.

2002-yilgi Jahon Chempionatida Braziliya Roberto Karlos bilan Turkiya, Kosta-Rika va Xitoy o‘rin olgan guruhda g‘olib chiqqan, keyin esa pley-offda Belgiya, Angliya va Turkiyani yengdi. Finalda braziliyaliklar Germaniyani mag‘lub etdi – 2:0. Chap qanot himoyasida harakat qiladigan futbolchi to‘liq o‘yin o‘tkazdi.

2002-yilda Roberto Karlos “Oltin to‘p”ni qo‘lga kiritishi mumkin edi. Biroq ovoz berishda vatandoshi Ronaldodan biroz ortda qoldi va ikkinchi o‘rinni egalladi.

Rafael Varan

Himoyachi 2018-yilda Rossiyadagi Jahon chempionatida g‘olib chiqqan. Undan avvalroq “Real” bilan Chempionlar Ligasini yutgandi. “Qaymoqranglilar” “Tottenhem”, “Inter” va “APOEL” bilan bir guruhdan o‘rin oldi va ikkinchi o‘rinni egalladi. “Qirollik klubi” 1/8 finalda “PSJ”ni, chorak finalda “Yuventus”ni, yarim finalda “Bavariya”ni musobaqadan chiqarib yubordi. Finalda esa “Liverpul” 3:1 hisobida taslim etildi.

Varan Rossiyada bo‘lib o‘tgan mundialda Fransiya terma jamoasining barcha o‘yinlarida ishtirok etdi — birinchi daqiqadan oxirgi daqiqagacha. Chorak finaldan o‘rin olgan Urugvayga qarshi o‘yinda g‘alaba to‘pini kiritdi. Fransuzlar Daniya, Peru va Avstraliya o‘rin olgan guruhdan chiqdi. Pley-offda gollarga boy o‘yinda Argentina 4:3 hisobida mag‘lub etildi. Chorak finalda Urugvay, yarim finalda esa Belgiya bilan dog‘da qoldirildi. “Lujniki”da bo‘lib o‘tgan finalda Didye Desham shogirdlari xorvatlarni 4:2 hisobida mag‘lub etib, chempionga aylandi.

“Manchester Siti” futbolchisi Xulian Alvares yoki “Inter” forvardi Lautaro Martines oltin dublga erishgan tarixdagi o‘ninchi futbolchiga aylanishi mumkin.

Eslatib o‘tamiz, “Manchester Siti” va “Inter” o‘rtasidagi YCHL finali 10-iyundan 11-iyunga o‘tar kechasi 00:00 da start oladi.