“Янги Ўзбекистон” боғида қумли пляж очилди

Тошкент вилояти Қибрай туманида жойлашган “Янги Ўзбекистон” боғида 30 май куни қумли пляж очилди. Бу ҳақда боғ маъмурияти “Дарё”га маълум қилди.

Хабар берилишича, пляжда қуёш остидаги шезлонглар, соябонлар, душлар, кийим алмаштириш хоналари ва тез тиббий ёрдам пункти мавжуд. Учта нуқтада тез тайёрланадиган таомлар, ичимликлар ва сузиш воситалари (аксессуарлар) сотилади. Бундан ташқари, қайиқлар учун алоҳида кўл ҳам мавжуд. Сузиш учун мўлжалланган сув ҳавзасининг чуқурлиги 175 сантиметргача боради.

Парк маъмуриятининг маълум қилишича, сув бир жойда турмаслиги сабаб кичик оқим бор. Шунингдек, қумлар ҳақиқий пляждаги билан бир хил.

Чипта нархлари турли ёш тоифаларига ҳар хил тарифда амал қилади:

• 4 ёшгача — бепул;
• 5 ёшдан 10 ёшгача — 40 000 сўм (ҳафта кунлари) ва 60 000 сўм (дам олиш куни);
• катталар учун — 60 000 сўм (ҳафта кунлари) ва 90 000 сўм (дам олиш куни);
• пенсионерлар — 30 000 сўм (ҳафта кунлари) ва 45 000 сўм (дам олиш куни).

Қўшимча қилинишича, пляж ҳар кунлик режимда, одатда, соат 10:00 дан 22:00 гача ишлайди. Аммо душанба кунлари санитария-профилактика ишлари муносабати билан соат 12:00 дан очилади.

“Пляж 22:00 гача хизмат кўрсатади, аммо 20:00 дан сўнг янги мижозлар қабул қилинмайди”, — дейди парк ходими.

Таъкидланишича, тўлов амалга оширилгач пляждан бир марталик чегараланмаган фойдаланиш ҳуқуқи берилади. Ҳеч қандай соатлик чекловлар йўқ.