Toshkent viloyati Qibray tumanida joylashgan “Yangi O‘zbekiston” bog‘ida 30-may kuni qumli plyaj ochildi. Bu haqda bog‘ ma’muriyati “Daryo”ga ma’lum qildi.
Xabar berilishicha, plyajda quyosh ostidagi shezlonglar, soyabonlar, dushlar, kiyim almashtirish xonalari va tez tibbiy yordam punkti mavjud. Uchta nuqtada tez tayyorlanadigan taomlar, ichimliklar va suzish vositalari (aksessuarlar) sotiladi. Bundan tashqari, qayiqlar uchun alohida ko’l ham mavjud. Suzish uchun mo‘ljallangan suv havzasining chuqurligi 175 santimetrgacha boradi.
Park ma’muriyatining ma’lum qilishicha, suv bir joyda turmasligi sabab kichik oqim bor. Shuningdek, qumlar haqiqiy plyajdagi bilan bir xil.
Chipta narxlari turli yosh toifalariga har xil tarifda amal qiladi:
- 4 yoshgacha — bepul;
- 5 yoshdan 10 yoshgacha — 40 000 so‘m (hafta kunlari) va 60 000 so‘m (dam olish kuni);
- kattalar uchun — 60 000 so’m (hafta kunlari) va 90 000 so’m (dam olish kuni);
- pensionerlar — 30 000 so’m (hafta kunlari) va 45 000 so’m (dam olish kuni).
Qo‘shimcha qilinishicha, plyaj har kunlik rejimda, odatda, soat 10:00 dan 22:00 gacha ishlaydi. Ammo dushanba kunlari sanitariya-profilaktika ishlari munosabati bilan soat 12:00 dan ochiladi.
“Plyaj 22:00 gacha xizmat ko‘rsatadi, ammo 20:00 dan so‘ng yangi mijozlar qabul qilinmaydi”, — deydi park xodimi.
Ta’kidlanishicha, to‘lov amalga oshirilgach plyajdan bir martalik chegaralanmagan foydalanish huquqi beriladi. Hech qanday soatlik cheklovlar yo‘q.