Қозоғистондаги заводдан иш ҳақини ололмай келаётган Ўзбекистон фуқароларининг муаммолари бартараф этилди, деб хабар беради Ташқи меҳнат миграцияси агентлиги.
Қайд этилишича, Ўзбекистоннинг Қозоғистондаги элчихонасига Остона шаҳридаги Astana Recycling Plant заводида вақтинча меҳнат фаолиятини амалга ошираётган ўзбекистонликлар иш ҳақи ва ҳужжатларини олиб беришда ёрдам сўраб мурожаат қилган.
Муаммога аниқлик киритиш ва уни бартараф этиш мақсадида завод директори элчихонага таклиф этилган. Музокараларда мажбурий меҳнат жиноят экани тушунтирилган.
Натижада иш берувчидан 32 нафар юртдошимизнинг 15 миллион тенге (33 700 АҚШ доллари) миқдоридаги иш ҳақи ундирилиб, шахсни тасдиқловчи паспортлари қайтариб олинган.
Қарздорликни ундириш
Март охирларида Мажбурий ижро бюроси Фарғона вилояти бошқармаси ва унинг ҳудудий бўлимлари томонидан 126 нафар ишчи-ходимнинг иш ҳақлари, шунингдек, Тошкент шаҳри Мирзо Улуғбек туманида фуқарога хонадоннинг ярим миллиард сўм миқдоридаги улуши ундириб берилганди.
Бундан ташқари, Ўзбекистонда 2022 йилда Меҳнат инспекцияси томонидан касаба уюшма аъзоларига қарийб 54 миллиард сўм зарар пуллари ундириб берилган.
Изоҳ (0)