Фарғона вилоят Табиат ресурслари бошқармаси “Андархон” чегара пости ёнида дарахтлар қўпориб ташлангани айтилган хабарларга муносабат билдирди.
Блогер Никита Макаренко 21 май куни Telegram’даги каналига “Андархон” чегара пости ёнидаги дарахтлар қўпориб ташлангани тасвирланган видеони жойлади. Юқоридаги ҳолат Фарғона вилояти Табиат ресурслари бошқармаси давлат инспекторлари томонидан ўрганилган.
Ўрганиш давомида Бешариқ тумани “Андархон” чегара пости ёнида манзарали 3 туп тол ҳамда 9 туп арча дарахтлари номаълум шахслар томонидан ноқонуний равишда илдиз қисмидан қўпориб олиб ташлангани ва ўсимлик дунёсига 99 575 500 сўм миқдорида зарар етказилгани аниқланган.
Ҳозирда ҳуқуқбузарлар шахсига ойдинлик киритиш ва ҳуқуқий баҳо бериш учун тўпланган ҳужжатлар вилоят прокуратурасига тақдим этилган.
Ноқонуний дарахт кесиш ҳолатлари
Ўзбекистонда 2022 йил давомида дарахт ва буталарнинг ноқонуний кесилиши ортидан табиатга 10 миллиард сўм зарар етказилган. Ўтган йилда жами 1 777 туп қимматбаҳо ва кўп йиллик дарахтлар кесилган. Вазият таҳлил этилганда, қурилиш объектлари атрофини ўраб олиш натижасида дарахтларнинг қаровсиз қолиши, шикастланиши ва нобуд бўлиш ҳолатлари содир этилаётгани аниқланган.
Изоҳ (0)