Ўзбекистон—Венгрия халқаро тиббиёт форуми бўлиб ўтади
Жаҳон соғлиқни сақлаш ассамблеясининг 76-сессияси ишида иштирок этиш учун ташриф билан Женевага борган соғлиқни сақлаш вазири Амрилло Иноятов бошчилигидаги Ўзбекистон делегация вакиллари ташқи иқтисодий алоқалар ва ташқи ишлар вазири Петер Сийярто бошчилигидаги Венгрия делегация билан учрашув ўтказди.
Бўлиб ўтган самарали мулоқот давомида Венгрия томони билан бир қатор келишувларга эришилди, икки давлат соғлиқни сақлаш соҳаси учун ўзаро манфаатли таклифлар илгари сурилди. Венгрия соғлиқни сақлаш тизими венгриялик мутахассисларининг мураккаб касалликларни даволашда эришган ютуқлари, шунингдек, мамлакат клиникаларининг замонавий диагностика ускуналари билан жиҳозлангани туфайли Европа Иттифоқидаги энг яхши тизим ҳисобланади.
Ҳар бир инсоннинг сифатли тиббий хизматдан фойдаланиши учун зарур шарт-шароитларни яратиш билан бирга, янада самарали соғлиқни сақлаш тизимини яратиш ҳар икки давлат учун тиббиёт соҳасида устувор вазифа эканлиги таъкидланди. Мамлакатлар тиббиёт кадрларини тайёрлаш, тажриба ва технологиялар алмашиш, янги турдаги дори воситалари ҳамда тиббий асбоб-ускуналарни биргаликда ишлаб чиқиш каби соҳаларда ҳамкорлик қилиш учун катта имкониятларга эга.
Шу нуқтаи назардан, томонлар Ўзбекистонда фармасевтика ва тиббиёт йўналишларини ўз ичига олган Debresen университети филиалини очиш хусусида фикр алмашди. Шунингдек, Венгрия фармасевтика компаниялари иштирокида Ўзбекистонда дори воситалари ишлаб чиқариш масалалари кўриб чиқилди. Учрашув якунида Будапештда Ўзбекистон—Венгрия тиббиёт форумини ўтказиш бўйича келишувга эришилди.
