Qozog‘istondagi zavoddan ish haqini ololmay kelayotgan O‘zbekiston fuqarolarining muammolari bartaraf etildi, deb xabar beradi Tashqi mehnat migratsiyasi agentligi.
Qayd etilishicha, O‘zbekistonning Qozog‘istondagi elchixonasiga Ostona shahridagi Astana Recycling Plant zavodida vaqtincha mehnat faoliyatini amalga oshirayotgan o‘zbekistonliklar ish haqi va hujjatlarini olib berishda yordam so‘rab murojaat qilgan.
Muammoga aniqlik kiritish va uni bartaraf etish maqsadida zavod direktori elchixonaga taklif etilgan. Muzokaralarda majburiy mehnat jinoyat ekani tushuntirilgan.
Natijada ish beruvchidan 32 nafar yurtdoshimizning 15 million tenge (33 700 AQSH dollari) miqdoridagi ish haqi undirilib, shaxsni tasdiqlovchi pasportlari qaytarib olingan.
Qarzdorlikni undirish
Mart oxirlarida Majburiy ijro byurosi Farg‘ona viloyati boshqarmasi va uning hududiy bo‘limlari tomonidan 126 nafar ishchi-xodimning ish haqlari, shuningdek, Toshkent shahri Mirzo Ulug‘bek tumanida fuqaroga xonadonning yarim milliard so‘m miqdoridagi ulushi undirib berilgandi.
Bundan tashqari, O‘zbekistonda 2022-yilda Mehnat inspeksiyasi tomonidan kasaba uyushma a’zolariga qariyb 54 milliard so‘m zarar pullari undirib berilgan.
Izoh (0)