Мажбурий ижро бюросининг Нукус шаҳар бўлими томонидан 3 нафар ходимнинг иш ҳақи ундириб берилди. Бу ҳақда ЎзА хабар берди.
Қайд этилишича, Фуқаролик ишлари бўйича Нукус туманлараро судининг 2021 ва 2022 йиллар давомидаги 4 дона ижро варақасига асосан, қарздор “Нукус полиграф комбинати” масъулияти чекланган жамиятидан ундирувчи мазкур жамиятнинг 3 нафар ходими фойдасига 50 миллион сўмдан зиёд иш ҳақларини ундириш белгиланган бўлиб, мазкур ижро варақалари Мажбурий ижро бюросининг Нукус шаҳар бўлими иш юритувига келиб тушган.
Ижро ҳаракатлари давомида, қарздор жамиятнинг ҳисоб рақамига банд солинган ва тегишли ташкилотларга сўровномалар юборилиб, жавоблари олинган. Қарздорнинг номида Нукус шаҳри Қорақалпоғистон кўчасида жойлашган кўчмас мулк аниқланиб, давлат ижрочиси томонидан хатловга олинган. Шунингдек, қарздор жамият раҳбари қарздорликни берилган ихтиёрий муддатда тўламагани сабабли, тегишли тартибда маъмурий жавобгарликка тортилган.
Олиб борилган мажбурий ижро ҳаракатлари натижасида қарздорлик тўлиқ ундирилиб, ҳақдорларнинг банк пластик карталарига ўтказиб берилиши таъминланди.
Қарздорликни ундириш
Март охирларида Мажбурий ижро бюроси Фарғона вилояти бошқармаси ва унинг ҳудудий бўлимлари томонидан 126 нафар ишчи-ходимнинг иш ҳақлари, шунингдек, Тошкент шаҳри Мирзо Улуғбек туманида фуқарога хонадоннинг ярим миллиард сўм миқдоридаги улуши ундириб берилганди.
Бундан ташқари, Ўзбекистонда 2022 йилда Меҳнат инспекцияси томонидан касаба уюшма аъзоларига қарийб 54 миллиард сўм зарар пуллари ундириб берилган.
Изоҳ (0)